Xitay da'iriliri Uyghur aptonom rayonida héchqandaq korona wirusi yuqumdari qalmighanliqini élan qildi

Muxbirimiz erkin
2020-03-09
Élxet
Pikir
Share
Print

Xitay da'iriliri 8‏-mart küni Uyghur aptonom rayonidiki eng axirqi korona wirusi yuqumdarining saqayghanliqi, rayonda héchqandaq yuqumdar qalmighanliqini élan qilip, qatnashning asasen eslige kelgenlikini jakarlighan.

Ürümchi shehiride 9‏-marttin bashlap hökümet organliri, idare jem'iyet, bir qisim karxana we tarqaq dukanlar ishqa chüshüp, ammiwi qatnash eslige kelgen. Lékin közetküchiler yerlik da'irilerning bu qararidin qattiq endishe qilmaqta. Ular yerlik da'irilerning rayondiki yuqum ehwalini yoshurup, bu jehettiki sanliq melumatlarni toluq élan qilmighanliqini ilgiri sürüp keldi. Uyghur aptonom rayonluq sehiye da'irilirining qeyt qilishiche, korona wirusida yuqumlinip karantin'gha élin'ghan eng axirqi bimar 8‏-mart küni saqiyip doxturxanidin chiqqan. Da'iriler bingtu'en 9‏-déwiziyesidiki mezkur bimarning doxturxanidin chiqishi bilen rayondiki 73 neper yuqumdardin héchkim qalmighanliqini ilgiri sürmekte.

Da'iriler ilgiri mezkur rayonda 76 neper yuqumdar bayqalghanliqi, ulardin 3 nepirining ölgenlikini élan qilghan. Uyghur aptonom rayonluq sehiye-salametlik komitéti 8‏-mart élan qilghan uqturushida, mezkur rayonda yéqinqi 18 kündin béri héchqandaq yuqumdar bayqilip baqmighanliqini bildürgen. Lékin chet'eldiki Uyghur teshkilatlirining ilgiri sürüshiche, xitay hökümiti dunyaning diqqitini qozghap qoymasliq, shundaqla Uyghur "Éshincha emgek küchliri" ni yötkesh üchün rayonda korona wirusining kontrol qilin'ghanliqini ilgiri sürmektiken. Xitay hökümiti 2‏-ayning 22‏-künidin bashlap Uyghur yashlirini "Éshincha emgek küchi" namida rayondiki we ichkiri ölkilerdiki karxanilargha keng kölemlik yötkeshke bashlighanidi.

Toluq bet