Yéqinqi 10 künde 1100 neper Uyghur ishchi korona wirusining merkizi bolghan xitay ölkilirige yötkelgen

Muxbirimiz erkin
2020-03-02
Élxet
Pikir
Share
Print

Pütün xitayni korona wirusi qaplap, nurghun ölke-sheherler qamal qilin'ghan mezgilde xitay hökümiti "Éshincha emgek küchliri" namidiki Uyghur ishchilirini wirus tarqalghan xitay ölke-sheherlirige dawamliq yolgha salmaqta.

Xitaydiki "Junggo xewerliri" torining 1‏-marttiki uchurida ashkarilinishiche, yéqinqi 10 kün ichide Uyghur aptonom rayonining jenubidiki xoten, qeshqer qatarliq 3 wilayet bir oblasttin 1100 neper Uyghur ishchi xitay ölkilirige yolgha sélin'ghan.

Bu, 26‏-féwral küni qeshqer wilayitidin xunenning changsha shehiride yolgha sélin'ghan 242 neper Uyghur ishchini öz ichige alidiken. Xitay hökümiti 2‏-ayning 22‏-küni tunji türkümde xotenlik 171 neper Uyghur ishchini xunen'ge yolgha salghanidi.

Xitayning wuxen shehiride partlighan korona wirusi pütün xitayni qaplap, nurghun ölke-sheherler karantin'gha élin'ghan, nurghun zawutlar taqilip, xitay puqralirining talagha chiqishi cheklen'gen mezgilde Uyghur ishchilirini wirus tarqalghan bu ölkilerge yolgha sélishi xelq'ara taratqularning diqqitini qozghap, chet'eldiki Uyghurlarda xitayning gherizige qarita guman peyda qilghan. Bezi közetküchiler xitay da'irilirining herikitini "Pilanliq tewekkülchilik" dep eyibligenidi.

Xitay hökümiti Uyghur "Éshincha emgek küchliri" ni yötkep, ularning namratliqtin qutulushigha yardem qiliwatqanliqini ilgiri sürsimu, lékin uning mezkur pilani xelq'arada jiddiy so'al peyda qilmaqta. Awstraliye istratégiyelik siyaset instituti 1‏-mart küni doklat élan qilip, xitayning lagérlardiki tümenligen Uyghur tutqunlirini Uyghur rayonining ichi we sirtidiki zawutlargha yötkep, dunyadiki dangliq markilargha mehsulat ishleydighan bu zawutlarda mejburiy ishlitiwatqanliqini ilgiri sürgen. "Junggo xewerliri" ning ashkarilishiche, hazirgha qeder ichkiri ölkilerge yolgha sélin'ghan Uyghurlar ichide xotenlik ishchilar eng köp salmaqni igileydiken.

Toluq bet