Хитай ташқи ишлар министири франсийәдиму намайишчиларниң күчлүк қаршилиқиға дуч кәлди

Мухбиримиз әркин
2020-08-28
Елхәт
Пикир
Share
Принт

Хитай ташқи ишлар министири ваң йи 25-авғуст башланған 6 күнлүк явропа зияритиниң һәр бекитидә уйғур, хоңкоң, тибәт вә тәйвән намайишчилириниң күчлүк қаршилиқиға дуч кәлмәктә. 28-Авғуст норвегийәдики зияритини ахирлаштуруп фирансийәгә йетип барған ваң йи бу йәрдиму күчлүк қаршилиққа учриди. Уйғур, хоңкоң вә тибәтләрни қоллайдиған намайишчилар 28-авғуст әтигәндә фирансийә ташқи ишлар министирлиқиниң йенида намайиш қилған.

Намайишчилар фирансийә һөкүмитиниң кишилик һоқуқни алдинқи орунға қоюши, хитайниң уйғур, тибәт вә хоңкоңлиқларға зиянкәшлик қилишини тохтитишқа чақиришини тәләп қилған.

Җүмә күни йәнә фирансийә уйғур җәмийити билән әркин тибәт оқуғучилар һәрикитиму фирансийә ташқи ишлар министирлиқи йенида топланған болуп, шу күни японийәниң токйо, австралийәниң адилайт, геманийәниң франкфурт, американиң вашингтон шәһәрлиридә өткүзүлгән уйғур дияридики җаза лагерлириға қарши зәнҗирсиман намайишларға аваз қошқан.

Улар фирансийә президенти макрон вә ташқи ишлар министири ле дириянниң ваң йи билән көрүшкәндә хитайниң уйғур, тибәтләрни бастурушиға ашкара қарши чиқишини тәләп қилған. Мәлум болушичә, ваң йи 30-авғуст күни фирансийә хәлқара мунасивәтләр тәтқиқат институтидики бир паалийәткә қатнишидикән. Бу һәқтики хәвәрләрдә фирансийә уйғур җәмийити билән әркин тибәт оқуғучилар һәрикитиниң шу күни ваң йиға қарши йәнә йиғилиш өткүзүдиғанлиқи илгири сүрүлди.

Пикирләр (0)
Share
Толуқ бәт