Gérmaniye axbarat sahesi Uyghurlar mesilisi heqqide wang yigha so'al qoydi

Muxbirimiz eziz
2020-09-01
Élxet
Pikir
Share
Print

Gérmaniyede xizmet ziyaritide boluwatqan xitay tashqi ishlar ministiri wang yi shu jaydiki axbarat élan qilish yighinida "Uyghurlardin 'kespiy terbiyelesh merkizi'de oquwatqanlarning hemmisi esebiylik we térrorluq idiyelirining zeherlishidin xalas bolup, jem'iyet qoynigha qaytip keldi. Hazir u jaylarda héchkim qalmidi" dégendin kéyin axbarat sahesining so'allirigha kömülüp ketti.

Ziyaret jeryanida gérmaniye tashqi ishlar ministiri xayko mas özlirining xongkong we Uyghurlarning weziyitidin bekmu endishe qiliwatqanliqini bildürgen hemde wang yidin Uyghurlar diyaridiki lagérlar mesilisi heqqide so'al sorighan. Söhbette wang yi yene bir qétim "Uyghurlar mesilisi bizning ichki ishimiz. Xelq'araning buninggha arilishish heqqi yoq" dégen. Xayko mas bu heqte ehwal tonushturup "Men uningdin qayta-qaytilap birleshken döletler teshkilati (b d t) tekshürgüchilirining lagérlarni tekshürüshige yol qoyushni soridim" dégen.

"El jezire" qanilining 1-séntebirdiki xewiride éytilishiche, buningdin birnechche kün ilgiri chéx jumhuriyiti wekiller ömiki teywenni ziyaret qilghandin kéyin wang yi "Chéx hökümiti bu qilmishi üchün bedel töleydu" dégen. Xayko mas bu heqte toxtilip, xitay tashqi ishlar ministirliqi éytqan bu sözlerning diplomatiye yosunigha chüshmeydighan "Tehdit" ikenlikini, yawropa ittipaqida öz'ara barawerlik we hörmetning asas qilinidighanliqini tekitligen.

"Firansiye xewer agéntliqi" ning 1-séntebirdiki xewiride éytilishiche, wang yi ziyaretke kelgen küni gérmaniye tashqi ishlar ministirliqining sirtida Uyghurlar we xongkong démokratiyesini qollighuchilarning zor kölemlik naraziliq namayishigha duch kelgen. Dunya Uyghur qurultiyi (d u q)ning re'isi dolqun eysa bu heqte söz qilip "Wang yining 'lagérlar taqaldi. Hazir u jayda héchkim qalmidi' dégen sözliri qipqizil yalghan. Ular kona muqam boyiche yene bir qétim köz boyamchiliq qilip dunyani aldimaqchi boluwatidu" dédi.

Toluq bet