Вашингтондики хитай әлчиханиси алдида мухбирларни күтүвелиш йиғини вә намайиш өткүзүлиду

Мухбиримиз әзиз
2018-04-17
Елхәт
Пикир
Share
Принт

Уйғурлар диярида барғансери юғури пәллигә чиқиватқан «йепиқ тәрбийә» долқуниниң әһвали һәққидә ташқи дуняни техиму яхши хәвәрләндүрүш үчүн 19-апрел күни, йәни пәйшәнбә чүштин бурун америкиниң пайтәхти вашингтон шәһиридики хитай баш әлчиханиси алдида мухбирларни күтүвелиш йиғини һәмдә наразилиқ намайиши өткүзүлиду.

Бу қетимқи паалийәтни «уйғур кишилик һоқуқ қурулуши» тәшкилати вә том ләнтос кишилик һоқуқ вә адаләт фонди бирликтә тәшкиллигән болуп, америка уйғур бирләшмиси, хәлқара кишилик һоқуқ вә демократийә фонди җәмийити қатарлиқлар йеқиндин қоллиған.

Америка уйғур бирләшмисиниң торида елан қилинған учурларға қариғанда, бу қетимқи паалийәттә мунасивәтлик затлар һәрқайси ахбарат васитилиригә уйғурлар дияридики «йепиқ тәрбийәләш» долқуни һәққидә учурлар беридикән, шундақла уларниң бу һәқтики соаллириға җаваб беридикән. Бу қетимқи паалийәткә америка дөләт мәҗлиси, кишилик һоқуқ җәмийәтлири қатарлиқ тәшкилатлардин вәкилләр қатнишидиған болуп, йиғиндин кейин уйғур җамаити хитай һөкүмитиниң уйғурларни бастурушиға наразилиқ билдүрүш йүзисидин намайиш қилидикән.

Америка уйғур бирләшмиси бу мунасивәт билән баянат елан қилип, шараити яр бәргән уйғурлар, болупму вәтәндики уруқ-туғқанлири «тәрбийәләш мәркәзлири» гә әвәтилгән уйғурларни шу кишиләрниң учурлирини вә чоңайтилған рәсимлирини елип келишкә дәвәт қилған. Шуниң билән биргә уйғурларни «хитай һөкүмитидин давамлиқ үмид күтүп йүрмәслик» кә чақирған.

Пикирләр (0)
Share
Толуқ бәт