Washin'gtondiki xitay elchixanisi aldida muxbirlarni kütüwélish yighini we namayish ötküzülidu

Muxbirimiz eziz
2018-04-17
Élxet
Pikir
Share
Print

Uyghurlar diyarida barghanséri yughuri pellige chiqiwatqan "Yépiq terbiye" dolqunining ehwali heqqide tashqi dunyani téximu yaxshi xewerlendürüsh üchün 19-aprél küni, yeni peyshenbe chüshtin burun amérikining paytexti washin'gton shehiridiki xitay bash elchixanisi aldida muxbirlarni kütüwélish yighini hemde naraziliq namayishi ötküzülidu.

Bu qétimqi pa'aliyetni "Uyghur kishilik hoquq qurulushi" teshkilati we tom lentos kishilik hoquq we adalet fondi birlikte teshkilligen bolup, amérika Uyghur birleshmisi, xelq'ara kishilik hoquq we démokratiye fondi jem'iyiti qatarliqlar yéqindin qollighan.

Amérika Uyghur birleshmisining torida élan qilin'ghan uchurlargha qarighanda, bu qétimqi pa'aliyette munasiwetlik zatlar herqaysi axbarat wasitilirige Uyghurlar diyaridiki "Yépiq terbiyelesh" dolquni heqqide uchurlar béridiken, shundaqla ularning bu heqtiki so'allirigha jawab béridiken. Bu qétimqi pa'aliyetke amérika dölet mejlisi, kishilik hoquq jem'iyetliri qatarliq teshkilatlardin wekiller qatnishidighan bolup, yighindin kéyin Uyghur jama'iti xitay hökümitining Uyghurlarni basturushigha naraziliq bildürüsh yüzisidin namayish qilidiken.

Amérika Uyghur birleshmisi bu munasiwet bilen bayanat élan qilip, shara'iti yar bergen Uyghurlar, bolupmu wetendiki uruq-tughqanliri "Terbiyelesh merkezliri" ge ewetilgen Uyghurlarni shu kishilerning uchurlirini we chongaytilghan resimlirini élip kélishke dewet qilghan. Shuning bilen birge Uyghurlarni "Xitay hökümitidin dawamliq ümid kütüp yürmeslik" ke chaqirghan.

Toluq bet