Washin'gton pochtisi: “Amérikaning Uyghur irqiy qirghinchiliqigha qarshi yürgüzgen jazasi yéterlik emes”

“Washin'gton pochtisi” géziti 14-mart tehrirat maqalisi élan qilip, amérikaning “Uyghur irqiy qirghinchiliqi” gha qaratqan jazasi xitaygha ziyan séliwatqanliqi, biraq buning yéterlik emeslikini bildürgen. “Washin'gton pochtisi” ning éytishiche, amérika téximu ünümlük netijige érishish üchün paxta we pemidur import qilishni cheklesh we bir qanche emeldarni jazalashtin halqighan tedbirlerni élishi kérek iken. Biraq tehrirat maqaliside amérika hökümitining qandaq tedbirlerni élishi kérekliki tilgha élinmighan.

Maqalide éytilishiche, “Xitay dunyagha özining shinjangdiki Uyghur we bashqa musulmanlargha yürgüzgen irqiy qirghinchiliqigha taqabil turushta ünümlük tedbirlerning barliqi” ni uqturghan. “Amérikaning Uyghur irqiy qirghinchiliqigha qaratqan jazasi xitayning jénidin ötüshke bashlighan, biraq yéterlik emes” mawzuluq maqalide, xitay tashqi ishlar ministirliqining ötken hepte amérikaning jazasi seweblik “Shinjangdiki nurghun shirket we shexslerning éghir ziyan'gha uchrawatqanliqi” ni élan qilghanliqi tekitligen.

Xitay tashqi ishlar ministirliqi ötken hepte “Shinjangdiki shirket we shexsler” ning amérikadiki “Kommunizm qurbanliri xatire fondi” ning tetqiqatchisi adriyan zénzni sotqa béridighanliqi, uning doklati seweblik nurghun chet'el shirketlirining shinjanggha mal zakaz qilishni toxtatqanliqini bildürgen. “Washin'gton pochtisi” ning tekitlishiche, “Shundaqtimu, amérika we bashqa démokratik döletlerning inkasini Uyghurlargha qarshi sadir qilin'ghan jinayetning kölimige sélishturghanda teng derijilik dégini bolmaydiken”.