Washin'gton pochtisi: “Amérikidiki shirketler étnik tazilashqa qatnishiwatqan xitay karxanilirigha ishleydu”

Muxbirimiz erkin
2018.09.24

“Washin'gton pochtisi” gézitide élan qilin'ghan bir maqalida, bezi amérika karxanilirining Uyghur rayonidiki “Étnik tazilash” qa qatnishiwatqan xeykang shirkiti bilen hemkarliship, uning qilmishigha shérik bolup qalmasliqi agahlanduruldi. Maqalida, xitayning Uyghur rayonidiki yighiwélish lagérlirini közitish kamérasi bilen teminlewatqan xeykang shirkiti bezi amérika shirketlirining yardimige érishiwatqanliqini tekitligen.

Maqalida qeyt qilinishiche, bu shirketler amérika qanunlirigha xilapliq qilmighan bolsimu, lékin bu ehwal pat yéqinda özgirishi mumkin iken. Amérika dölet mejlisining 17 neper ezasi yéqinda tashqi ishlar ministiri pompé'o bilen maliye ministiri minuchin'gha xet yézip, xeykang shirkiti bilen daxu'a shirkitini ularning Uyghur rayonidiki qilmishi seweblik jazalashni telep qilghan.

Amérika awam palatasi bu yil 5‏-ayda chiqarghan yene bir qanunida amérika dölet organlirigha xeykang, daxu'a shirketlirining kaméralirini ishlitishni chekligen idi.

Ston yazghuchisi isak ston fishning “Washin'gton pochtisi” gézitidiki “Amérikidiki karxanilar néme üchün étnik tazilashqa qatnishiwatqan xitay shirkitige ishleydu?” serlewhilik maqaliside qeyt qilishiche, amérikining burson-marstéllér, sidléy a'ustin, intél, amazon qatarliq karxanilirining xeykang shirkiti bilen soda munasiwiti bar iken. Emma bu karxanilar xeykang shirkitining Uyghur rayonidiki kishilik hoquqqa xilap qilmishlirigha da'ir so'allargha jawab bérishni ret qilghan.

Isak ston fishning bildürüshiche, burtun-marstéllérning bayanatchisi xeykang shirkiti bilen uning amérikidiki meshghulati da'iriside hemkarlishiwatqanliqini ilgiri sürüp, uning Uyghur rayonidiki qilmishigha da'ir so'algha jawab bérishni ret qilghan.

Aptor maqaliside yene IBM shirkitining öz waqtida natsistlargha eswab sétip bergenliki, bu eswabning natsistlar teripidin yehudiylargha ishlitilgenlikini eskertip, burson-marstéllér shirkiti we uning xadimlirini agahlandurghan.

U “Belki shinjang weziyiti yaxshilinip qélishi mumkin yaki bu irqiy qirghinchiliqqa aylinip kétishi mumkin. Qisqisi, shi jinpingning jallatlirining qatarigha tizimlinip qalmanglar” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.