«Вашингтон почтиси» ниң қәшқәргә әвәткән мухбирлири лагерларниң давамлиқ кеңийиватқанлиқини байқиған

Мухбиримиз ирадә
2020-09-24
Елхәт
Пикир
Share
Принт

«Вашингтон почтиси» гезити уйғур елидики ғайәт зор көләмлик түрмиләрниң давамлиқ көпийиватқанлиқини хәвәр қилди. Мәзкур гезитниң мухбирлири өткән айда уйғур елиниң қәшқәр вә ғулҗа қатарлиқ җайлирида зиярәттә болған болуп, улар шу қетимлиқ зиярити асасида йүрүшлүк хәвәр мақалилирини елан қилмақта.

23-Сентәбир күни «вашингтон почтиси» гезити мухбирлириниң қәшқәр зиярити асасида елан қилған хәвиридин мәлум болушичә, хитай даирилири қәшқәрдә зор көләмлик лагер яки түрмә биналирини давамлиқ көпәйтип ишқа кириштүрмәктикән. Мухбирлар қәшқәрдә 60 инглиз моси келидиған бир орунға селинған 13 қәвәтлик бир лагер бинасини сүрәткә алған болуп, бу бина техи бу йил 1-айда ишқа кириштүрүлгән икән. Пәқәт мушу бинаниң өзигила 10 миңдин артуқ адәм сиғидикән.

Охшаш күндә йәнә австралийә истратегийәлик сиясәт тәтқиқат орни (ASPI) му йеңи доклат елан қилип, йеңи байқашларниң уйғур елидә лагерларниң давамлиқ көпәйтиливатқанлиқини көрситип беридиғанлиқини билдүргән иди. «Вашингтон почтиси» гезити өз хәвиридә бу нуқтини тәкитләп, мундақ дегән: «йеқинда ‹вашингтон почтиси' гезитиниң шинҗаңға қаратқан зиярити вә шундақла канберрадики тәтқиқат орни ASPI тәрипидин елан қилинған испатлар хәлқаралиқ бесим вә тәнқидләрниң хитай һөкүмитиниң райондики юқири бесимлиқ зулумни тохтитишида һечқандақ пайдиси болмиғанлиқини көрситип бәрди. Әксичә райондики зулум йәниму күчийип, шумлуққа қарап маңмақта.»

«Вашингтон почтиси» гезитиниң мухбирлири қәшқәрдә йеңи қурулған бу лагерларниң илгирики лагер қилип қолланған орунларға қариғанда көзитиш вә назарәт әслиһәлири җәһәттин йәниму күчәйтилгәнликини, мунар вә сим ришаткилириниң техиму егизликини байқиған. «Вашингтон почтиси» гезитиниң хәвиридә «ASPI» тәтқиқатчиси русерниң сөзини нәқил қилип: «бу орунлар инсанларни тутқун қилиш арқилиқ уларни җәмийәт һаятидин бирақла йоқитиветишни мәқсәт қилған. Бу орунлар қандақтур ‹тәрбийәләш' яки ‹өзгәртиш' орни әмәс. У пәқәт исми өзгәртилгән түрмә,» дегән.

«Вашингтон почтиси» гезитиниң ейтишичә, гезит мухбирлири билән йәнә икки явропалиқ мухбир қәшқәрдики йеңи лагерларни сүрәткә алмақчи болуп йолға чиққанда, йәрлик сақчи даирилириниң давамлиқ тәқиби вә кашилисиға учриған икән.

Мухбирлар уйғур мәдәнийитиниң бөшүки қәшқәрдә әрләрниң сақал-бурути йоқлуқини, аялларниң асасән яғлиқсиз кетиватқанлиқини, һечкимниң чәтәллик мухбирлар билән сөзлишишкә җүрәт қилалмайдиғанлиқини, мәсчитләрниң бир болса печәтләнгән бир болса чайхана, кафехана дегәнләргә өзгәртилгәнликини көргән.

Пикирләр (0)
Share
Толуқ бәт