Gherb közetküchiliri: Uyghur élidiki weqelerning sewebi iqtisadiy barawersizlik

Muxbirimiz jüme
2014-05-07
Share

Xitay da'iriliri Uyghur élidiki qarshiliq heriketlirining hemmisini atalmish diniy ashqunlargha dönggep kéliwatqan bolsimu, gherb közetküchiliri weqelerning sewebi rayondiki iqtisadiy barawersizlik ikenlikini ilgiri sürdi.

Roytérsta xewer qilishiche, Uyghur élide yerlik Uyghurlar ish tépishta kemsitilishke uchrawatqan mezgilde, xitayning bashqa jayliridin nechche ming chaqirim yol yürüp bu jaygha kelgen köchmenler intayin tizla xizmet tapalaydiken.

Xewerde neqil qilishiche, Uyghur élige yéngi kelgen shi famililik bir xitay köchmen mundaq dégen: bu yerde kirim yaxshi bolghachqa shunche yol yürüp kelduq. Uyghurlarning nopusi az, ular bu yerdiki ishlarning hemmisini qilip tügitelmeydu.

Halbuki, yerlik Uyghurlar Uyghur élide ish pursetlirining intayin azliqigha qarimay, bu yerdiki xizmetlerning xitay aqqunlargha bérilidighanliqini bildürüshken.

Éli isimlik bir Uyghur yash mundaq dégen: bu yerde sirttin kelgenler intayin köp, ular ish izdep kelgen. Emma ish orni unche jiq emes.

Xewerde körsitishiche, xongkong pen-téxnika uniwérsitétidiki proféssor bary sa'utman: xizmet tépishqa kelsek, sewiyisi yuqiri Uyghurlarmu qattiq cheklimilerge uchraydu, yenila köpligen xizmet orunliri xitaylar bilen toldurulidu, dégen.

Ötken yili Uyghur élide körülgen qarshiliq weqeliride 100 din artuq adem öltürülgen.

Uningdin bashqa bu yil kirgendin buyan, künming wogzali hujumi we ürümchi wogzali adembomba hujumi yüz bérip, ilgiri-kéyin bolup 30 nechche adem ölgen, 100 din artuq adem yarilan'ghan.

Xitay da'iriliri weqeni Uyghur diniy ashqunlar sadir qilghanliqini xewer qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet