Da'iriler Uyghur élidin 64 neper "Wetenperwer diniy zat" ni tallap xitay ölkilirige ékskursiyige ewetken

Muxbirimiz qutlan
2016-11-21
Share

Uyghur élining siyasiy weziyitige yéqindin diqqet qilip kéliwatqan közetküchiler da'irilerning rayondiki her derijilik islam diniy jem'iyetlirining wasitisi bilen atalmish "Wetenperwer diniy zat" larni yasap chiqiriwatqanliqini ilgiri sürmekte.

"Shinjang géziti" ning bu heqtiki xewirige qarighanda, da'iriler Uyghur élidin jem'iy 64 neper "Wetenperwer diniy zat" ni tallap xitay ölkilirige ékskursiyige ewetken.

Xewerde déyilishiche, ularning köpinchiliri Uyghur élining herqaysi jayliridiki meschitlerge hökümet teripidin teyinlen'gen yash imamlar iken. Ular hökümet xirajiti bilen 10-ayning 19-künidin 11-ayning 19-künigiche bolghan bir ay jeryanida shenshi, jyangsu, xunen ölkiliridiki meschitler bilen yerlik islam dini jem'iyetlirini ékskursiye qilghan.

Igilinishiche, bu pa'aliyetni xitay memliketlik merkiziy ittipaq komitéti, yashlar birleshmisi we Uyghur aptonom rayonluq ittipaq komitéti birlikte teshkilligen bolup, ékskursiye ömikidikiler qaytip kélip özliri turushluq jaylarda teshwiqat pa'aliyetliri bilen shughullinidiken.

Ular ékiskursiyeni axirlashturup ürümchige qaytip kelgendin kéyin da'irilerge ipade bildürüp, özlirining meschitlerde "Muqimliq we ittipaqliq" heqqide wez sözleydighanliqini, "Diniy esebiylik" ke qarshi turup kompartiyening din we milletler siyasitini himaye qilidighanliqini bildürgen.

Muhajirettiki Uyghur közetküchiler bilen siyasiy analizchilar xitay hökümitining Uyghur élining muqimliqini tutup turush üchün özliri bir qolluq terbiyilep yétishtürgen atalmish "Wetenperwer diniy zat" lardin paydiliniwatqanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet