Wiki shüning qismiti Uyghurlar duch kéliwatqan ré'alliqni wasitilik halda eks ettürdi

Muxbirimiz eziz
2021-11-03
Share

Hazir awstraliyede yashawatqan wikiy shü emdila 27 yashqa kirgen bolushigha qarimay özining yéziqchiliq, tetqiqat we komédiye sahesidiki köp qirliq talanti bilen dunya jama'itige tonulghan meshhur kishilerning biri bolup qaldi. Emma uning Uyghurlar üchün söz qilip xitay hökümitining neziride "Közge qadalghan miq" qa aylinip qélishi uning bash aptorluqida tamamlan'ghan "Sétiliwatqan Uyghurlar", "Zulumning qurulmisi" qatarliq doklatlarning élan qilishi bilen téximu roshenleshti.

"Koda hékayiliri" 2-noyabir küni élan qilghan bu heqtiki ziyaret xatiriside ene shu mesililer nuqtiliq muhakime qilinidu. Bolupmu Uyghur diyaridiki omumiy nazaret méxanizmi, pütkül puqralarning hökümet üchün "Köz-qulaq" qa aylandurulushi, yuqiri pen-téxnika wasitiliri toluq qollinilghan hakimmutleqliqning bezi tepsilatliri janliq bayan qilinidu. Wiki shüning bayan qilishiche, "Sétiliwatqan Uyghurlar" namliq doklat élan qilin'ghandin kéyin Uyghur diyaridiki mejburiy emgekning kölimi we derijisi tunji bolup sistémiliq halda pash qilin'ghan. Shuning bilen tengla xitay hökümitining wiki shüni "Milliy munapiq", "Pahishe", "Zeher chekküchi" dégendek ibariler bilen haqaretlishi otturigha chiqqan. Uyghur diyaridiki mejburiy emgekke baghlinishliq bolghan Nike we Apple shirketlirimu shu sewebtin xelq'arada tenqidlerge uchrashqa bashlighan. Gerche u awstraliyege oxshash erkin dunyada yashawatqan bolsimu hélihem pat-patla ölüm tehditliri we bashqa tehditlik uchurlarni tapshuruwalidiken. Jümlidin awstraliyediki xitay elchixanisimu uninggha téléfon qilip qamlashmighan so'allarni sorap turidiken.

Wiki shüning bildürüshiche, xitay hökümiti ashu doklatlar élan qilin'ghandin kéyin buninggha munasiwetlik barliq uchurlarni öchürüp tashlighan. Emma uning qarishiche milyonlighan ademni lagérgha qamash hemde ulargha qarita rohiy we jismaniy qiynaqlarni dawam qildurush, shuning bilen birge ghayet zor kölemdiki mejburiy emgekni ijra qilish héchqandaq hökümet herqandaq qilsimu yoshurup qalalmaydighan zor paji'e iken. Shunga u xitay hökümitining bu achchiq ré'alliqni yoshurush urunushlirini emelge ashmaydu, dep qaraydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet