Вашингтон почтиси гезити: «волкесвагин директориниң хитайниң мусулманларни бастурушини билмәслики қандақму мумкин болсун?»

Мухбиримиз әркин
2019-04-22
Елхәт
Пикир
Share
Принт

«Вашингтон почтиси гезити» тәһрират мақалиси елан қилип, германийә аптомобил ширкити - волкесвагинниң иҗраийә директориниң уйғурлар һәққидики сөзини қаттиқ тәнқид қилди. «Волкесвагин директориниң хитайниң уйғурларни бастуруватқанлиқини билмәслики қандақму мумкин болсун?» сәрләвһилик мақалидә, униң сөзи «йиргинчлик», дәп әйибләнгән. Волкесвагинниң иҗраийә директори дайес йеқинда шаңхәйдә өткүзүлгән хәлқара аптомобил көргәзмисидә б б с ниң мухбириға уйғурларниң әһвалидин хәвири йоқлуқини билдүргән. Волкесвагинниң баянатчиси кейинрәк униң сөзини түзитип, ширкәтниң уйғурларниң әһвалидин хәвири барлиқини билдүргән, шуниңдәк «кишилик һоқуққа һөрмәт қилиш волкесвагин гуруһиниң барлиқ сода мунасивәтлиридики түп принсиплириниң биридур» дегән болсиму, лекин дайесниң сөзи хәлқара таратқуларда зор ғулғула қозғиған иди.

«Вашингтон почтиси гезити» ниң 19‏-апрел елан қилған тәһрират мақалисидә мундақ дейилгән: «бу раст әмәс. У завутлири пүтүн хитайға тарқалған бир хәлқара ширкәтниң рәһбири болуш сүпити билән шинҗаңда йүз бериватқан вәһшийликни билиши керәк. Униң сөзи, йиргинчлик вә биарам қиларлиқ болуш билән биргә, бу йәнә волкесвагинниң уйғур вә башқилар учраватқан муамилигә қарита қаймуқиватқанлиқини ипадиләйду».

Волкесвагин хитайда әң бурун завут ачқан ғәрб ширкәтлириниң биридур. Униң хитайдики тунҗи завути 1984‏-йили шаңхәйдә қурулған. Волкесвагин 2013‏-йили үрүмчидә өзиниң тармақ ишләпчиқириш завутини қурған иди. «Вашингтон почтиси гезити» мақалисидә, хитайниң уйғур районидики җаза лагерлирини йошурушқа урунуп кәлгәнлики, шуниңдәк шаһитлар вә мутәхәссисләрниң пүткүл районни бир тәқибләш тәҗрибиханисиға айлинип қалди, дәп қараватқанлиқи әскәртилип, «волкесвагиндәк бир чоң ширкәт җаза лагерлириға көз юммаслиқи, болупму германийәлик бир иҗраийә директори техиму бу лагерлар мәвҗут әмәстәк муамилә қилмаслиқи керәк» дейилгән.

Пикирләр (0)
Share
Толуқ бәт