Washin'gton pochtisi géziti: "Wolkéswagin diréktorining xitayning musulmanlarni basturushini bilmesliki qandaqmu mumkin bolsun?"

Muxbirimiz erkin
2019-04-22
Élxet
Pikir
Share
Print

"Washin'gton pochtisi géziti" tehrirat maqalisi élan qilip, gérmaniye aptomobil shirkiti - wolkéswaginning ijra'iye diréktorining Uyghurlar heqqidiki sözini qattiq tenqid qildi. "Wolkéswagin diréktorining xitayning Uyghurlarni basturuwatqanliqini bilmesliki qandaqmu mumkin bolsun?" serlewhilik maqalide, uning sözi "Yirginchlik", dep eyiblen'gen. Wolkéswaginning ijra'iye diréktori dayés yéqinda shangxeyde ötküzülgen xelq'ara aptomobil körgezmiside b b s ning muxbirigha Uyghurlarning ehwalidin xewiri yoqluqini bildürgen. Wolkéswaginning bayanatchisi kéyinrek uning sözini tüzitip, shirketning Uyghurlarning ehwalidin xewiri barliqini bildürgen, shuningdek "Kishilik hoquqqa hörmet qilish wolkéswagin guruhining barliq soda munasiwetliridiki tüp prinsiplirining biridur" dégen bolsimu, lékin dayésning sözi xelq'ara taratqularda zor ghulghula qozghighan idi.

"Washin'gton pochtisi géziti" ning 19‏-aprél élan qilghan tehrirat maqaliside mundaq déyilgen: "Bu rast emes. U zawutliri pütün xitaygha tarqalghan bir xelq'ara shirketning rehbiri bolush süpiti bilen shinjangda yüz bériwatqan wehshiylikni bilishi kérek. Uning sözi, yirginchlik we bi'aram qilarliq bolush bilen birge, bu yene wolkéswaginning Uyghur we bashqilar uchrawatqan mu'amilige qarita qaymuqiwatqanliqini ipadileydu".

Wolkéswagin xitayda eng burun zawut achqan gherb shirketlirining biridur. Uning xitaydiki tunji zawuti 1984‏-yili shangxeyde qurulghan. Wolkéswagin 2013‏-yili ürümchide özining tarmaq ishlepchiqirish zawutini qurghan idi. "Washin'gton pochtisi géziti" maqaliside, xitayning Uyghur rayonidiki jaza lagérlirini yoshurushqa urunup kelgenliki, shuningdek shahitlar we mutexessislerning pütkül rayonni bir teqiblesh tejribixanisigha aylinip qaldi, dep qarawatqanliqi eskertilip, "Wolkéswagindek bir chong shirket jaza lagérlirigha köz yummasliqi, bolupmu gérmaniyelik bir ijra'iye diréktori téximu bu lagérlar mewjut emestek mu'amile qilmasliqi kérek" déyilgen.

Toluq bet