Wolks-wagén shirkiti Uyghur élidiki tijaritini dawamlashturidighanliqini bildürgen

Muxbirimiz irade
2020.01.09

Gérmaniyening gherbiy shimaligha jaylashqan nidazaksin shtatliq hökümiti yeni “Lower saxony” gérmaniye “Yéshillar partiyesi” ning wolks-wagén aptomobil shirkitining Uyghur élidiki tijariy pa'aliyetlirini dawam qilish mesilisidiki so'aligha duch kelgen.

“Gérmaniye awazi” radiyosining xewer qilishiche, ular buninggha qayturghan jawabida xitayning gherbidiki iqtisadiy tereqqiyatining yaxshi kétiwatqanliqini nezerde tutup, wolks-wagén shirkitining ürümchidiki zawutining ishlepchiqirishni dawamlashturidighanliqini bildürgen.

Xewerde yene shangxey bilen ortaq hemkarliq astidiki bu zawut ichide kishilik hoquq depsendichilikining yoqluqi, zawuttiki 650 neper ishchining töttin bir qismining az sanliq millet ikenliki we buning ürümchining nopus alahidiliki bilen maslishidighanliqi bayan qilin'ghan.

Nidazaksin shtatliq hökümiti wolks-wagén shirkitining 20 pirsentlik pay chékige ige bolup, shtat bashliqi stéfan wéyl wolks-wagén shirkitining re'isler uyushmisining ezaliridin biri iken. U “Yéshillar partiyesi” ning bu heqtiki so'allirigha jawab bergende wolks-wagénning ürümchidiki zawutida nöwette yiligha 50 ming aptomobil ishlep chiqirilidighanliqi we uning ishlepchiqirish iqtidarining dawamliq ashurulidighanliqini bildürgen. Biraq u shirketke a'it bashqa melumatlarni ashkarilashqa bolmaydighanliqini ipade qilghan.

Gérmaniyening dangliq aptomobil markiliridin bolghan wolks-wagin aptomobil shirkitining ijra'iye bashliqi hérbért dayés 2019-yili 4-ayda shangxeydiki aptomobil körgezmisige qatnishiwatqanda BBC agéntliqi muxbirining Uyghur élidiki lagérlar heqqidiki so'aligha duch kelgen idi. Muxbir xitay hökümitining Uyghur élide “Qayta terbiye” namida bir milyondin oshuq kishini qamap qoyghanliqini éytishi bilen u: “Men uninggha baha bérelmeymen. Méning ehwaldin xewirim yoq” dégen. Uning bu jawabi ijtima'iy taratqularda qattiq tenqidke uchrighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.