Saqchi da'iriliri wukendiki naraziliq bildürgüchilerdin 13 ademni tutqun qilghan

Muxbirimiz ümidwar
2016-09-13
Élxet
Pikir
Share
Print

Xitay saqchi da'iriliri 13-séntebir küni gu'angdung ölkisining luféng nahiyisi wuken kentidiki naraziliq heriketlirini tinchitqan bolup, xitay hökümet terep 13 ademning tutqun qilin'ghanliqini bildürgen.

Roytérs agéntliqining xewer qilishiche, saqchi küchliri naraziliq bildürgüchilerge qaritip közdin yash aqquzush bombisi we rézinke oq atqan.

B b s agéntliqining yézishiche, mezkur kenttiki ahaliler 6-ayning 19-künidin étibaren özlirining tutup kétilgen kent bashliqi lin zulyenni qoyup bérish, yer igidarchiliq hoquqi we bashqa hoquqlirini qoghdashni telep qilip naraziliq namayishi ötküzüp kelmekte idi.

Wuken yézisida 2012-yili, xelq ashkara saylam ötküzüp, özliri xalighan lin zulyenni wuken kentining kent bashliqigha saylighan idi. Eyni waqitta gu'angdungning wuken kentidiki xelqning mezkur erkin saylimi küchlük tesir peyda qilghan bolup, emma, bu yil 18-iyun küni gu'angdung luféng nahiye saqchi da'iriliri lin zulyenni parixorluq qilmishini tekshürüsh nami bilen tutup ketken idi.

8-Séntebir küni lin zulyen üch yilliq qamaq jazasi we 400 ming som jerimane töleshke höküm qilin'ghandin kéyin, uning wukendiki qollighuchiliri bu hökümdin narazi bolghan.

Ahalilerning ilgiri sürüshiche, luféng saqchi terep 13-séntebir küni tang seherde köp sanda jama'et xewpsizlik, qoralliq we alahide saqchilarni wuken'ge ewetip, kent ahalilirining öylirige kirip axturush we tutqun qilish élip barghan. Luféng jama'et xewpsizlik idarisi bayanat élan qilip, tutqun qilin'ghanlarning ösek söz tarqitip, kishilerni naraziliq pa'aliyitige zorlighanliqini eyibligen.

Toluq bet