Uyghur élida 16 doxturxana “Wuxen wirusi” ni dawalash orni qilip békitilgen

Xelq'arada “Wuxen wirusi” dep atiliwatqan yéngi tiptiki tajsiman wirus bilen yuqumlan'ghuchilar sani téz sür'et bilen köpeymekte. Roytérsning xewer qilishiche, 24-yanwar küni xitayda bu wirus bilen ölgenler sani 26 neperge, yuqumlan'ghuchilar sani 887 neperge yetken.

Xitay hökümitining bu wirus mesiliside yéterlik derijide ochuq-ashkara bolmaywatqanliqi heqqidiki xewerler bu wirusning zadi qanchilik da'iride kéngeygenliki heqqide türlük guman we endishilerni peyda qilmaqta. 

23-Yanwar küni Uyghur aptonom rayonluq da'irilermu rayonda ikki kishining “Wuxen wirusi” bilen yuqumlinip karantin'gha élin'ghaniqini élan qilghan. Bügünki xewerlerdin qarighanda, Uyghur aptonom rayonluq da'iriler herqaysi wilayet, oblast, sheherlerde yéngi tiptiki tajsiman wirus bilen yuqumlan'ghan'ghuchilarni dawalash boyiche 16 doxturxanining tizimlikini élan qilghan. Bundin bashqa yene diyagnoz qoyush nuqtisi we 212 dawalash apparatida qizitma ambulatoriyesi échilghan. 

“Tengritagh tori” ning xewer qilishiche, 1-ayning 23-küni chüshtin kéyin Uyghur aptonom rayonluq da'iriler Uyghur rayonluq partkom sériktari chén chüen'goning yétekchilikide jiddiy yighin chaqirip bu heqtiki xizmetlerni orunlashturghan. Chén chüen'go sözide siyasiy yükseklikte ching turup, shi jinping idiyesidin tewrep ketmeslikni, muqimliqqa qet'iy kapaletlik qilishni tekitligen. 

Chet'ellerdiki közetküchilerning qarishiche, Uyghur rayonida yolgha qoyulghan bu tedbirler késellik ehwalining jiddiylikidin dérek béridiken. 

Uyghur éli weziyitini yéqindin közitip kéliwatqan tetqiqatchilardin adriyan zénz we jeymis milward qatarliqlar eger bu wirus Uyghur élida bir milyondin oshuq kishi qamilip yatqan lagérlargha tarqalghan teqdirde yüz bergüsi paji'e heqqide öz endishilirini ipade qildi.