Uyghur rayoni we xitayda “Wuxen wirusi” bilen yuqumlan'ghuchilar sani tézdin köpeymekte

Muxbirimiz irade
2020.02.13

Uyghur rayonida “Wuxen wirusi” bilen yuqumlan'ghuchilar sani tézdin köpeymekte. Uyghur aptonom rayonluq da'iriler 12-féwral küni rayonda yene 4 kishining wirus bilen yuqumlan'ghanliqini élan qildi.

“Tengritagh tori” ning bu heqtiki xewiridin qarighanda, yéngidin yuqumlan'ghuchilarning 2 nepiri ghuljada, 1 nepiri ürümchide we yene bir nepiri bingtu'en 4-déwiziyeside bayqalghan.

Netijide Uyghur rayonida 12-féwral küni sa'et 0 din 24 kéche bolghan ariliqta békitilgen omumiy yuqumlan'ghuchi sani 63 neperge, yuqum gumani bilen közitish astigha élin'ghan kishiler sani 4479 neperge yetken. Ölgen kishilerning sani 1 neper bolup, uning bingtu'en 8-déwiziyesi jaylashqan shixenzediki 80 yashliq biri ikenliki melum.

Xitayning xubéy ölkisi wuxen shehiridin tarqalghan bu wirusning xitay miqyasidiki tarqilish ehwalimu intayin jiddiy bolmaqta. Wuxen da'iriliri charshenbe küni bir kün ichidila 242 kishining wirus sewebidin hayatidin ayrilghanliqini jakarlidi. Arqidinla xitay da'iriliri xubéy ölkisining partkom sékrétari jyang chawliyang we wuxen sheherlik partkom sékrétari ma gochiyangni wezipisidin élip tashlap, ularning orunlirigha shangxey shehirining sheher bashliqi ying yong we jinen sheherlik partkomning sékrétari wang jonglingning yötkep kélin'genlikini jakarlidi.

Melum bolushiche, xitay da'iriliri 13-yanwar küni yéngidin 14800 kishining wirus bilen yuqumlan'ghanliqini élan qilghan. Biraq ular bundaq zor reqemning yuqumlinishning kéngiyishidin emes, belki yuqumlan'ghuchilarni sanashtiki yéngiche métod bilen munasiwetliklikini ilgiri sürgen. Netijide xitay boyiche omumiy yuqumlan'ghuchi sani 59805 neperge yetken bolup, 1367 kishining yuqum sewebidin ölgenliki melum.

“El-jezire” téléwiziyesining bu heqtiki xewiridin qarighanda, hazirghiche az dégende 25 dölette bu wirus bilen yuqumlan'ghuchilar bayqalghan bolup, dunya sehiye teshkilati “Wuxen wirusini” pütün dunyagha nisbeten “Zor tehdit” dep jakarlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.