Xitay hökümiti "Korona wirusi bilen yéngidin yuqumlan'ghanlar yoq" dep élan qildi

Muxbirimiz nur'iman
2020-03-11
Share

"Xitay xewerler tori" ning 11-mart bergen xewiride 10-mart, sa'et 0 din 24 kéche bolghan ariliqta tajsiman wirus bilen yuqumlan'ghuchilarning mu'eyyenleshken omumiy sani 76, ölgenler sani 3, doxturxanidin saqiyip chiqqanlar sani 73, yéngidin yuqumlan'ghanlar yoq, dep élan qilghan.

Emma xelq'ara metbu'atlargha asaslan'ghanda, dunyaning bashqa jayliridiki yuqumlan'ghuchilarning sani éship barmaqta. "Washin'gton pochtisi" ning 11-marttiki korona wirusi heqqidiki xewirige asaslan'ghanda, dunya miqyasida korona wirusi bilen yuqumlan'ghuchilarning sani 120000 din ashqan bolup, gérmaniye bash ministiri an'géla mérkil "Wirusning gérmaniyege yétip kelgenliki" ni uqturush qilghan. Xewerlerge qarighanda, gérmaniyede 70 pirsent ademning yuqumlinishi mumkin iken. Amérikada yuqumlan'ghuchilarning sani 1000 din ashqan bolup, 30 din artuq kishining wirus yuqumi bilen ölgenliki xewer qilin'ghan. Italiye, jenubiy koréye, iran qatarliq bashqa döletlerdimu yuqumlan'ghuchilarning jiddiy köpiyiwatqanliqi, wirus sewebidin ölgenlerning künsayin éship bériwatqanliqi élan qilinmaqta.

Dunya sehiye teshkilati bügünki bayanatida korona wirusini "Dunya xaraktérlik apet" dep élan qildi.

Xitayning wuxen shehiridin tarqilip dunya miqyasida tiz sür'ette yamrawatqan, bir qisim döletler "Jiddiy halet" élan qiliwatqan mezgilde xitayda wirus bilen yuqumlan'ghuchilarning sanining aziyishi, "Yéngidin yuqumlan'ghuchilar yoq" dep élan qélinishi guman qozghimaqta. Bezi siyasiy erbablar xitayning korona wirusi heqqide ashkarilawatqan sanliq melumatlarning gumanliq ikenlikini ilgiri sürmekte.

25-Féwral amérika tashqi ishlar ministiri mayk pompéyo xitayni "Wirusning heqiqiy ehwalini yoshurup, ölüm-yétimning éghirlishishigha seweb bolghan," dep eyibligen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet