Tajisiman wirusning dunyawi wabagha aylinip kétish éhtimalliqi endishe qozghimaqta

Muxbirimiz eziz
2020-02-25
Élxet
Pikir
Share
Print

Xitay hökümiti élan qilghan eng yéngi sanliq melumatlarda xitayda tajisiman wirustin yuqumlinip ölgenlerning sani 2600din ashqan, yuqumlan'ghanlarning sani 77 mingdin éship ketkende bu wabaning dunya üchün ortaq késelge aylinip kétish éhtimalliqi her sahe kishilirini jiddiy oylandurmaqtiken.

CNN Ning 25-féwraldiki xewiride éytilishiche, iranning mu'awin sehiye ministiri iraj xarirchigha bu wirusning yuqqanliqi hemde italiyede mushu wirus sewebidin ölgenlerning alliqachan yette kishige, jenubiy koréyede ölgenlerning 11 kishige yétishi bilen gherb dunyasida bu heqtiki endishilerge yéngi mezmunlar qoshuliwatqanliqi melum. Asiya qit'esi nöwette bu wirusning merkizi bolup qalghanliqtin bir qisim kishiler 2020-yili iyulda échilidighan tokyo yazliq olimpik musabiqisi, waqtida ötküzülmesliki mumkin, dep texmin qilishmaqtiken. Emma yaponiye terep "Hazirche bu musabiqe toghrisida söz qilish bek baldur" dégen. 

Amérikidiki NBC xewer agéntliqining 25-féwraldiki xewiride aq sarayning tajisiman wirusqa taqabil turush üchün amérika dölet mejlisidin ikki yérim milyarda amérika dolliri sorighanliqi éytilidu. Xewerde éytilishiche, bu meblegh wirusqa qarshi waksina yasash, wirusning tarqilishigha qarshi turush hemde buninggha munasiwetlik eswab-üskünilerge serp qilinidiken. Amérika prézidénti donald tramp buheqte söz qilip؛ "Tajisiman wirus amérikida toluq kontrolluq astida turiwatidu. Bu mesile pat yéqinda hel bolidu" dégen. 

Dunya sehiye teshkilati bügün bayanat élan qilip "Tajisiman wirusni dunyawi wabagha aylinip kétidu, déyish hazirche bek baldur" dédi.

Toluq bet