Моңғул паалийәтчиси хадани зиярәт қилмақчи болған франсийилик мухбирлар сақчилар тәрипидин сорақ қилинип қайтуруветилди

Мухбиримиз меһрибан
2015-02-24
Share


21 - Феврал күни моңғул паалийәтчиси хадани зиярәт қилмақчи болған икки нәпәр франсийилик мухбир, хаданиң көкхот шәһиридики туралғуси алдида сақчилар тәрипидин тутқун қилинип қайтуруветилгән. Радиомиз хитай бөлүминиң зияритини қобул қилған хада әпәндиниң билдүрүшичә, шәнбә күни чүштә бу икки мухбир көкхот шәһиридики чиңгизхан сақчиханисиға апирилип,чүштин кейин саәт 5 кичә сорақ қилинғандин кейин, айродромға мәҗбури елип берилип қайтуруветилгән.

Хаданиң аяли шиннаниң билдүрүшичә, хада түрмидин қоюп берилип өйгә қайтип кәлгән болсиму, әмма уларниң өйи йәнила сақчиларниң назарити астида болуп, хадани йоқлап кәлгән уруқ - туғқан, достлири сақчиларниң соал - сорақлиридин кейин андин өйгә киришкә рухсәт қилинған. Чәтәллик достлар вә мухбирларниң бу аилигә келип хадани зиярәт қилиши пүтүнләй чәкләнгән болуп, ишик алдидики назарәтчиләр уларға "чәтәллик зиярәтчиләрниң бу аилиликләр қорусиға киришигә рухсәт қилинмайдиғанлиқи" ни уқтурған.

Бу йил 60 яшқа киргән хада 1989 - йили "моңғул мәдәнийитини қутқузуш җәмийити"қурған вә моңғуллар үчүн али аптоном һоқуқи тәләп қилидиған мақалиләрни елан қилған. 1995 - Йили у даириләр тәрипидин "дөләтни парчилашқа урунған"дегән җинайәт билән әйиблинип, 15 йиллиқ қамақ җазасиға һөкүм қилинған. Әмма хада әпәндиниң 15 йиллиқ җаза муддити толғандин кейинму даириләр уни қоюп бәрмәй қанунсиз һалда 4 йил тутуп турған. Хаданиң аяли шиннаниң қайта - қайта әрз қилиши вә хәлқара кишилик һоқуқ тәшкилатлириниң әйиблиши билән даириләр бултур йил ахири хада әпәндини өйигә қайтурған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт