Хәлқара диний әркинлик алий кеңишидә уйғур мәҗбурий әмгикиниң алдини елиш мәсилиси муһакимә қилинди

Вашингтондин мухбиримиз уйғар тәйярлиди
2024.01.30

30-январ америка пайтәхти вашингтонда башланған 2024-йиллиқ хәлқара диний әркинлик алий кеңишидә уйғур мәҗбурий әмгикиниң алдини елиш қанунини иҗра қилиш вә коллектип мәсулийәт мәсилиси мәхсус муһакимә қилинди.

Бу муһим йиғинда, уйғур кишилик һоқуқ қурулушиниң тәтқиқатчиси җулийә милсап (Julie (Julie Millsap, хитай истратегийәлик риқабәт алаһидә комитетиниң хадими җәйк паркер (Jake Parker) , америка дөләт мәҗлиси хитай ишлири иҗраийә комитетиниң муавин мудири тод стәйин (Todd Stein) вә америка җумһурийәтчи авам палата әзаси кирис симис (Chris Smith) америкада уйғур мәҗбурий әмгикиниң алдини елиш қанунини иҗра қилиш әһвали вә буниңдики мәсулийәт қатарлиқ мәсилиләр һәққидә сөзлигән. Шуниң билән бир вақитта уйғур мәҗбурий әмгикиниң алдини елиш қануни йолға қоюлғандин кейин қолға кәлгән нәтиҗиләр, бу қанунни йолға қуюш җәрянида оттуриға чиққан қийинчилиқлар вә тәклип пикирләр оттуриға қоюлған.

 Америка таможна вә чегра қоғдаш идарисиниң башлиқи җоанне колонелло (JoAnne Colonnello) ниң тонуштурушичә, “уйғур мәҗбурий әмгикиниң алдини елиш қануни” америка таможна вә чегра қоғдаш идариси, ана вәтән бихәтәрлики министирлиқи, ташқи ишлар министирлиқиниң барлиқ бөлүмлири, америка дөләт мәҗлиси қатарлиқ мунасивәтлик органларниң һәмкарлиқи вә өзара күчлүк ярдими билән иҗра қилинидикән.

 Америка пирезиденти җов байден имза қойған мәзкур “уйғур мәҗбурий әмгикиниң алдини елиш қануни” 2022-йили 21-июндин башлап рәсмий иҗра қилинишқа башлиғаниди. Мәзкур қанунға асасән уйғур районида ишләпчиқирилип, америкаға импорт қилинидиған һәр қандақ мәһсулатниң уйғур мәҗбурий әмгики билән четишлиқи йоқлуқи қайил қиларлиқ дәлилләр билән испатланмиғучә, америка базириға кериши чәклиниду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.