Xitayning Uyghur élide chiqarghan mukapatlash we cheklesh uqturushi xelq'arada inkas qozghidi

Uyghur aptonom rayonluq jama'et xewpsizlik nazariti 2-iyul küni uqturush chiqirip, “Térror gumandarliri” ni pash qilghuchilarning mukapatlinidighanliqini, térror gumandarlirini yoshurghuchilar؛ yénida 15 santimétirdin uzun bolghan pichaq, partlash éhtimali bar buyumlarni élip yürgüchiler we diniy radikalliq heqqidiki uchurlarni tarqatquchilarning qattiq jazalinidighanliqini uqturghan.

En'gliye b b s agéntliqi xitay da'iriliri chiqarghan uqturush heqqide bergen xewiride, dunya Uyghur qurultiyi bayanatchisi dilshat rishitning sözini neqil élip,“Da'irilerning Uyghurlar üstidin yürgüzüwatqan qattiq basturush siyasitining rayondiki her xil qarshiliq heriketlirining yüz bérishige seweb boluwatqan” liqini alahide eskertti. Amérika awazining 2-iyul küni élan qilghan “Béyjing amérikini eyibligendin kéyin, yawropa ittipaqini térrorluqqa qarshi turushta qosh bisliq siyaset yürgüzdi dep eyiblidi” serlewhilik xewiride, “Xitay da'iriliri sherqiy türkistan térrorchiliri dep eyiblewatqanlar emeliyette shinjang chégrasi ichidiki we chet'ellerdiki sherqiy türkistan jumhuriyitini qurushni telep qiliwatqanlar bolup, ular asasliqi Uyghurlar. Béyjing hökümiti ularni rayonda yüz bergen atalmish“Térrorluq weqeliri” ni peyda qilghuchilar dep qarawatidu” déyildi.

Xitayning tashqi ishlar bayanatchisi xu'a chünying 2-iyul küni muxbirning yawropa ittipaqining 1-iyul künidiki bayanati heqqide sorighan so'aligha bergen jawabida: “Térrorluq junggo we shinjyangdiki her millet xelqining ortaq düshmini, eger bu mesilide kimki qosh bisliq siyaset yürgüzülüp, térrorchilargha kengchilik qilsa, axirqi hésabta bashqilargha we özige ziyankeshlik qilidu” dégen idi.