Xelq'ara kechürüm teshkilati xitay hökümitidin ilham toxtining iz-dérikini ashkarilashni telep qildi

Muxbirimiz irade
2014-01-30
Élxet
Pikir
Share
Print

Xelq'ara kechürüm teshkilati charshenbe küni mexsus bayanat élan qilip, xitay hökümitidin ilham toxtining iz-dérikini derhal ashkarilashni telep qildi.

Ular shundaqla xelq'ara jama'etni Uyghur musteqil tetqiqatchi ilham toxti üchün heriketke kélip, xitay hökümitige uni qoyuwétish heqqide bésim ishlitishke chaqirdi.

Mezkur teshkilat charshenbe küni élan qilghan mezkur bayanatida Uyghur biz tor bétining qurghuchisi, akadémik ilham toxtining xitay türmiside qéyin-qistaqqa élish yaki mejburiy asasta dawalash éhtimali barliqini eskertip: "Xitay hökümiti ilham toxtining tutup turuluwatqan mezgilde qéyin-qistaqqa élinmaydighanliqi we özining yaki a'ilisining raziliqi bolmay turup dawalinishqa élinmaydighanliqigha kapaletlik qilishi kérek" dédi.

Uyghur ziyaliysi ilham toxti mushu ayning 15-küni xitay saqchiliri teripidin öyidin ep kétilgendin buyan iz-dérikini élish mumkin bolmay kelmekte. Xitay da'iriliri ilham toxtining "Bölgünchilik qilish, hökümetni aghdurushni meqset qilghan guruhlarni teshkillesh we yétekchilik qilish" jinayiti sadir qilghanliqini bildürgen idi. Nöwette amérika, yawropa ittipaqi, kishilik hoquqni közitish teshkilati qatarliq dölet we organlar xitay hökümitige bu heqte ipade bildürüp, ilham toxtini derhal qoyuwétishni telep qildi.

Toluq bet