Xitay xelq'ara tertipke buzghunchiliq qilghanliqini inkar qildi

Muxbirimiz erkin
2017-10-20
Share

Xitay hökümiti amérika dölet ishliri ministiri tillérsonning sözige inkas qayturup, xitayning xelq'ara tertipke buzghunchiliq qilghanliqini inkar qilghan.

Amérika dölet ishlar ministiri réks tillérson charshenbe küni washin'gtondiki bir istratégiye tetqiqat merkizide nutuq sözlep, xitayning xelq'ara tertipke buzghunchiliq qiliwatqanliqini bildürgen idi. Biraq xitay tashqi ishlar ministirliqining bayanatchisi lu kang peyshenbe küni élan qilghan bayanatida xitayning "B d t ni yadro qilghan, b d t nizamnamisini meqset we nishan qilghan xelq'ara tertipni qet'iy qoghdaydighanliqi" ni bildürgen.

U yene xitayning öz tereqqiyatini dep bashqa döletlerning mepe'etini qurban qilmaydighanliqi we öz menpe'etidinmu waz kechmeydighanliqini eskertip, "Amérika terepning xitayning tereqqiyati we xelq'arada oynawatqan roligha ijabiy qarishini, xitaygha bolghan bir tereplimilik qarishidin waz kéchishini ümid qilimiz," dégen. Lu kang, xitayning xelq'ara tertipke buzghunchiliq qiliwatqanliqini inkar qilghan bolsimu, biraq u xelq'ara sotning bultur chiqarghan jenubiy déngiz mesilisi heqqidiki qararini étirap qilmaydighanliqini élan qilghan. Derweqe, xitay mezkur rayonda sün'iy aral yasashni we bu arallargha herbiy eslihelerni qurushni dawamlashturup kelgen idi.

Tillérson charshenbe küni qilghan sözide hindistan bilen xitayni sélishturup, "Xitay hindistan'gha oxshash bash kötiriwatqan dölet bolsimu, biraq u mes'uliyetchan emes. U hindistan qatarliq döletlerdek xelq'ara sistéma ichide heriket qilmay, xelq'ara qa'ide- tüzümlerge buzghunchiliq qiliwatidu. Xitayning jenubiy déngizdiki ighwagerchilik herikiti amérika we hindistan himayisidiki xelq'ara qanun we tüzümlerge qilin'ghan bir xiris," dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.