Firansiye agéntliqi Uyghur rayonidiki basturushta xitay puqralirining rol oynawatqanliqini eskertti

Muxbirimiz erkin
2018-04-26
Élxet
Pikir
Share
Print

Firansiye axbarat agéntliqi peyshenbe küni maqale élan qilip, Uyghur rayondiki basturushta xitay puqralirining rol oynawatqanliqini ilgiri sürdi.

"Ösmini yoqitish: shinjangdiki basturushta xitay puqraliri rol oynimaqta" serlewhilik bu maqalida, xitay hökümitining yézilargha chüshürgen xizmet guruppilirining wezipisi heqqide tepsiliy toxtalghan. Maqalida hökümet bu xizmet guruppilirining wezipisi "Xelqning könglini utush" désimu, lékin ularning xitay dölitige qarshi xewplerni tépip chiqish we ularni jazalashtek yene bir mexpiy wezipisining barliqini tekitligen.

Maqalida qaraqash nahiyesining yawa yézisi aqjighanliq kentige chüshken bingtu'en xizmet guruppisining bu wezipini eng ashqun halette ijra qiliwatqan xizmet guruppisi ikenliki, yézilargha ewetilgen bundaq xizmet guruppilirining 10 mingdin ashidighanliqini bildürgen. Maqalida ashkarilishiche, bingtu'en radiyo-téléwiziye uniwérsitétining xizmet guruppisi aqjighanliq kentige orunliship 4 aydin kéyin, bu kentning 100 din artuq ahalisi ghayib bolghan. Maqalida ularning tutqun qilin'ghanliqi yaki "Yépiq terbiyelesh lagérliri" gha yollan'ghanliqi eskertilip, bu mezkur kent nopusining 5 tin bir qismini teshkil qilidighanliqini bildürgen.

Maqalida qeyt qilishiche, bingtu'en xizmet guruppisi aqjighanliq kentige chüshken deslepki künlerde pütün kentke chaghanliq panuslarni asturup, ishqa orunlishish kursi échish, pakiz su bilen teminlesh, hökümet qorusini tazilashtek ishlar bilen shughullan'ghandek qilghan bolsimu, lékin uzun ötmey kent puqralirini soraq qilishqa, ularning mesilisi bar-yoqluqini éniqlashqa kirishken. Maqalida bingtu'en radiyo-téléwiziye uniwérsitéti teshwiqat bölümining bir xewiri neqil keltürülüp, "Biz aqjighanliq kentining közidiki tumanni pütünley tarqitip, perdining arqisigha qarishimiz we uningdiki ösmini késip tashlishimiz kérek," déyilgen.

Maqalida yene aqjighanliq kentining qaraqash nahiyesidiki saqchi bilen toshup ketken yüzlerche kentning biri ikenliki, bu yerdiki basturushning xelq'arani jiddiyleshtürüwetkenliki, amérika dölet ishliri ministirliqining ötken hepte bu rayondiki "Keng kölemlik tutqun qilish we mislisiz teqiblerdin barghanséri endishe qiliwatimiz," dégenlikini bildürgen.

Toluq bet