Хитай камбричдин чәкләшни тәләп қилған мақалиләр арисида уйғурларға аит мақалиләрниңму барлиқи тилға елинди

Мухбиримиз шөһрәт һошур
2017.08.23

Хитайниң әнглийәдики камбрич университетидин хитай һәққидики бир түркүм сәзгүр мақалиләрни чәкләшни тәләп қилиши, хәлқара җамаәттә бу мақалиләрниң темиси вә мәзмуни һәққидә қизиқиш пәйда қилди.

Ройтирис агентлиқиниң бүгүнки бу һәқтики мақалисидә мундақ дейилгән: “чәклиниши тәләп қилинған мақалиләрниң тема даирисидә 1989-йилидики тйәнәнмин вәқәси, хитайниң мәдәнийәт инқилаби, тибәт, тәйвән, шундақла җедәл бесиқмайдиған ғәрбий район шинҗаңму бар.”

Хәвәрдә дейилишичә, һиндистанлиқ тарихчи камал шилниң шинҗаң темисидики мақалилириму чәкләнгән. “шинҗаң” дегән аталғу сәзгүр сөзләр қатариға киргүзүлгәнлики үчүн, бу аталғуға шәкилдаш болған, әмма мәнидаш болмиған бир “шинҗаң” аталғуси қистурулған мақалиму, мәзмуни хитай компартийисини мәдһийиләш характеридә болсиму, хата һалда камбричниң торидин чиқириветилгән.

Материялларда көрситилишичә, камал шил уйғур райони һәққидики алақидар мақалисидә, районда зораванлиққа четилғанларни қаттиқ җазалашниң орниға, уларни қайил қилиш вә улардин актип күчләр қатарида пайдилинишни тәшәббус қилған.

Камбрич университети дәсләптә хитайниң тәлипигә бинаән “хитай пәсиллики” намлиқ журналниң тор бетидин 315 парчә мақалини чиқиривәткән вә бу әһвал илим дунясиниң қаттиқ тәнқидигә учриғандин кейин, чиқириветилгән мақалиләрни пүтүнләй әслигә кәлтүрүш қарарини алған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.