Xitay kambrichdin chekleshni telep qilghan maqaliler arisida Uyghurlargha a'it maqalilerningmu barliqi tilgha élindi

Muxbirimiz shöhret hoshur
2017-08-23
Élxet
Pikir
Share
Print

Xitayning en'gliyediki kambrich uniwérsitétidin xitay heqqidiki bir türküm sezgür maqalilerni chekleshni telep qilishi, xelq'ara jama'ette bu maqalilerning témisi we mezmuni heqqide qiziqish peyda qildi.

Roytiris agéntliqining bügünki bu heqtiki maqaliside mundaq déyilgen: "Cheklinishi telep qilin'ghan maqalilerning téma da'iriside 1989-yilidiki tyen'enmin weqesi, xitayning medeniyet inqilabi, tibet, teywen, shundaqla jédel bésiqmaydighan gherbiy rayon shinjangmu bar."

Xewerde déyilishiche, hindistanliq tarixchi kamal shilning shinjang témisidiki maqalilirimu cheklen'gen. "Shinjang" dégen atalghu sezgür sözler qatarigha kirgüzülgenliki üchün, bu atalghugha shekildash bolghan, emma menidash bolmighan bir "Shinjang" atalghusi qisturulghan maqalimu, mezmuni xitay kompartiyisini medhiyilesh xaraktéride bolsimu, xata halda kambrichning toridin chiqiriwétilgen.

Matériyallarda körsitilishiche, kamal shil Uyghur rayoni heqqidiki alaqidar maqaliside, rayonda zorawanliqqa chétilghanlarni qattiq jazalashning ornigha, ularni qayil qilish we ulardin aktip küchler qatarida paydilinishni teshebbus qilghan.

Kambrich uniwérsitéti deslepte xitayning telipige bina'en "Xitay pesilliki" namliq zhurnalning tor bétidin 315 parche maqalini chiqiriwetken we bu ehwal ilim dunyasining qattiq tenqidige uchrighandin kéyin, chiqiriwétilgen maqalilerni pütünley eslige keltürüsh qararini alghan idi.

Toluq bet