Хәлқара кәчүрүм тәшкилати бүзәйнәп абдурешитниң дәрһал қоюп берилишини тәләп қилди

Мухбиримиз әркин
2017-09-29
Елхәт
Пикир
Share
Принт

Хәлқара кәчүрүм тәшкилати 28‏-сентәбир җиддий баянат елан қилип, хитай даирилирини уйғур виҗдан мәһбуси бүзәйнәп абдурешитниң әһвалини ашкарилашқа, униң адил сотланған-сотланмиғанлиқи, һәқ-һоқуқлириға һөрмәт қилинған-қилинмиғанлиқини ениқлашқа чақирған.

Хәлқара кәчүрүм тәшкилати баянатида йәнә, даириләр униң җинайәт садир қилғанлиқиға йетәрлик дәлил көрситип берәлмисә, дәрһал қоюп беришни тәләп қилған.

Бүзәйнәп бурун мисирда 2 йил оқуған болуп, 2015‏-йили юртиға қайтип кәткән.

Хәлқара кәчүрүм тәшкилатиниң билдүрүшичә, у, юртиға қайтип кетип 2 йилдин кейин қолға елинған. Мәзкур тәшкилат баянатида, бүзәйнәпниң бу йил мартта ата-анисиниң үрүмчидики өйидә қолға елинғанлиқини, униң ақсуға елип берилип, июнда сотланғанлиқи вә 7 йиллиқ қамақ җазасиға һөкүм қилинғанлиқини билдүргән.

Хитай һөкүмити өткән йилниң ахирлиридин башлап мисирда оқуйдиған уйғур оқуғучиларниң юртидики ата-анилириға бесип ишлитип, зор бир түркүм оқуғучиларни қайтип келишкә мәҗбур қилған. Қайтип кәлгән бир қисим оқуғучилар из дерәксиз йоқап кәткән иди.

Хәлқара кәчүрүм тәшкилати, бүзәйнәпниң тутқун қилиниши хитайниң уйғурларға қарши елип бериватқан кәң-көләмлик бастуруш һәрикитиниң бир қисми болуши мумкинликини әскәртип, хитай даирилирини «униң аилиси вә өзи халиған адвокат билән нормал, дәхли-тәрузсиз учурушушиға, тән җазаси вә башқа қопал муамилигә учримаслиқиға капаләтлик қилиш» қа чақирған.

Улар йәнә хитайниң бүзәйнәпни «хәлқара өлчәмләргә асасән қайта сотлап, әгәр униң хәлқара бирдәк етирап қилған бирәр җинайәт садир қилғанлиқиға йетәрлик дәлил көрситип берәлмисә, уни дәрһал қоюп бериши» ни тәләп қилған.

Пикирләр (0)
Share
Толуқ бәт