Чәтәл унверситит оқуғучилириниң уйғур мәсилиси һәққидики тонуши артмақта

Мухбиримиз ирадә
2019-10-29
Елхәт
Пикир
Share
Принт

Канададики «Simon Fraser University» ниң һәптилик оқуғучилар жорнилида уйғурларниң вәзийити һәққидә бир мулаһизә мақалиси елан қилинди.

Мәзкур мақалидә, хитай һөкүмитиниң нөвәттә уйғур елидә 3 милйон әтрапида уйғур, қазақ қатарлиқ йәрлик мусулман милләтләрни лагерға қамап, уларниң миллий вә дини кимликини өчүрүшкә һәрикәт қиливатқанлиқи тонуштурулған. Мақалидә «ирқий қирғинчилиқ, миллий тазилаш һәрикәтлири өтмүштә қалмиди. Җүмлидин йиғивелиш лагерлириму һәм шундақ. Хитайниң шинҗаң районида даириләр 3 милйон әтрапида уйғур, қазақ вә башқа мусулман милләтләрни тутуп туруш орунлирида тутуп турмақта» дәп йезилған. 

Мақалидә, «хитай һөкүмити мусулманларни өз пуқралири арисидин йоқитишни мәқсәт қилған болсиму, әмма дуняниң буниңға қарап туруватқанлиқи, һәтта канададики бәзи унверсититларда хитай һөкүмәт тәшвиқатчилириниң бу лагерларни ‹кәспий маһарәт билән тәрбийәләш' мәркизи дәп тәшвиқ қилишиға йол қоюлғанлиқи «тәнқид қилинған: униңда йәнә «хитай һөкүмитиниң бир милләтниң мәдәнийитини йоқ қилишини нормаллаштурушқа болмайду» дәп әскәртилгән. 

Мәлум болушичә, йеқиндин буян чәтәлләрдики алий мәктәп оқуғучилириниң уйғур елидики лагерлар мәсилиси һәққидики тонуши хели өскән. 

28-Өктәбир күни, әнглийәдики унверсититларда оқуйдиған бир қисим оқуғучилар лондондики баш министирлиқ бинаси алдида намайиш қилип, уйғурларниң мәсилисигә диққәт тартқан. Мәзкур оқуғучиларниң тивиттир, фәйсбук қатарлиқ иҗтимаий таратқулар арқилиқ тарқатқан видийолиридин мәлум болушичә, намайишчи оқуғучилар хитай һөкүмитини лагирлардики уйғурларни қоюветишкә вә ялғанчилиқ қилип дуняни алдашни тохтутушқа чақирған.

Пикирләр (0)
Share
Толуқ бәт