Австралийәдики «ловей институти» тор бети уйғурлар һәққидә йиғин ечиш алдида хитай хаккерлириниң тор һуҗумиға учриған

Мухбиримиз ирадә
2018-12-04
Елхәт
Пикир
Share
Принт

Фирансийә агентлиқиниң хәвиридин қариғанда, австралийәдики нопузлуқ ташқи сиясәт тәтқиқат оргини болған «ловей институти» ниң тор бети хитайни мәнбә қилған тор һуҗумиға учриған. юқиридики бу һуҗумниң дәл австралийәдә уйғур мәсилиси бойичә җиддий паалийәт вә учришишлар давам қиливатқанда йүз бериши күчлүк диққәт қозғиди. Чүнки, дуня уйғур қурултийиниң рәиси долқун әйса, өмәр қанат вә нурий түркәл қатарлиқ уйғур паалийәтчилиридин тәшкилләнгән өмәк 5-декабир күни дәл мушу «ловей институти» да уюштурулған сөһбәт йиғиниға қатнишиш алдида туруватқан иди.

Австралийә дөләт бихәтәрликигә алақидар бир хадим фирансийә агентлиқиға қилған сөзидә әскәртишичә, хитай хаккерлириниң бу орган тор бетигә һуҗум қилишидики сәвәб униң австралийә һөкүмитиниң сиясәтлиригә тәсир көрситидиған орган болуши билән мунасивәтлик болуши мумкин икән. 

3-Декабир күни, уйғурларниң сиясий паалийәтлиригә йеқиндин көңүл бөлүп кәлгән австралийә парламент әзаси майкил дәнбий австралийә парламентида австралийәгә хас «магнетский қануни лайиһиси» ни тонуштуруш арқилиқ еғир кишилик һоқуқ дәпсәндичилики билән шуғуллиниватқан хитай һөкүмити вә униң әмәлдарлириниң җазалиниши керәкликини тәләп қилған. У австралийә парламенти әгәр бундақ бир қанунни мақуллиған тәқдирдә, буниң хитай һөкүмити тәрипидин йиғивелиш лагериға қамалған бир милйондин ошуқ уйғурниң мәсилисиниң унтулуп кетилмәслики үчүн пайдилиқ икәнликини тәкитлигән. 

Дуня уйғур қурултийи һәйити бу һәптә ичидә австралийә дөләтлик университети, сидней технологийә университети, австралийә ла троп университети вә «ловей институти» қатарлиқ орунлардики муһим паалийәтләргә иштирак қилиду.

Пикирләр (0)
Share
Толуқ бәт