Awstraliyediki "Lowéy instituti" tor béti Uyghurlar heqqide yighin échish aldida xitay xakkérlirining tor hujumigha uchrighan

Muxbirimiz irade
2018-12-04
Élxet
Pikir
Share
Print

Firansiye agéntliqining xewiridin qarighanda, awstraliyediki nopuzluq tashqi siyaset tetqiqat orgini bolghan "Lowéy instituti" ning tor béti xitayni menbe qilghan tor hujumigha uchrighan. Yuqiridiki bu hujumning del awstraliyede Uyghur mesilisi boyiche jiddiy pa'aliyet we uchrishishlar dawam qiliwatqanda yüz bérishi küchlük diqqet qozghidi. Chünki, dunya Uyghur qurultiyining re'isi dolqun eysa, ömer qanat we nuriy türkel qatarliq Uyghur pa'aliyetchiliridin teshkillen'gen ömek 5-dékabir küni del mushu "Lowéy instituti" da uyushturulghan söhbet yighinigha qatnishish aldida turuwatqan idi.

Awstraliye dölet bixeterlikige alaqidar bir xadim firansiye agéntliqigha qilghan sözide eskertishiche, xitay xakkérlirining bu organ tor bétige hujum qilishidiki seweb uning awstraliye hökümitining siyasetlirige tesir körsitidighan organ bolushi bilen munasiwetlik bolushi mumkin iken. 

3-Dékabir küni, Uyghurlarning siyasiy pa'aliyetlirige yéqindin köngül bölüp kelgen awstraliye parlamént ezasi maykil denbiy awstraliye parlaméntida awstraliyege xas "Magnétskiy qanuni layihisi" ni tonushturush arqiliq éghir kishilik hoquq depsendichiliki bilen shughulliniwatqan xitay hökümiti we uning emeldarlirining jazalinishi kéreklikini telep qilghan. U awstraliye parlaménti eger bundaq bir qanunni maqullighan teqdirde, buning xitay hökümiti teripidin yighiwélish lagérigha qamalghan bir milyondin oshuq Uyghurning mesilisining untulup kétilmesliki üchün paydiliq ikenlikini tekitligen. 

Dunya Uyghur qurultiyi hey'iti bu hepte ichide awstraliye döletlik uniwérsitéti, sidnéy téxnologiye uniwérsitéti, awstraliye la trop uniwérsitéti we "Lowéy instituti" qatarliq orunlardiki muhim pa'aliyetlerge ishtirak qilidu.

Toluq bet