Inféntino, Uyghur mesilisige qarimay dunya putbol kulubliri musabiqisining xitaygha bérilgenlikini aqlidi

Muxbirimiz erkin
2019-12-20
Élxet
Pikir
Share
Print

Xelq'ara putbol birleshmisining re'isi inféntino xelq'arada xitayning Uyghurlargha tutqan mu'amilisige qarita tenqidler küchiyiwatqan mezgilde dunya putbol kulublirining putbol musabiqisi sahibxanliqining xitaygha bérilgenlikini aqlighan. U 20‏-dékabir küni qatar paytexti doxada muxbirlargha söz qilip, "Belkim, kishiler xitaygha yaki dunyaning herqandaq bir jayigha bérip we top oynap buninggha oxshash mesililer heqqide dawamliq sözliyeleydu, bu mesilini otturigha qoyalaydu. Belkim, axirida xelqning weziyiti yaxshilinip qélishi mumkin" dégen. Xelq'ara putbol birleshmisi bu yil 10‏-ayda 2020‏-yilliq dunya kulublar putbol musabiqisining sahibxaniliq hoquqining shangxey shehirige bérilgenlikini élan qilghan.

Putbol birleshmisining xitay hökümiti 3 milyon'ghiche bolghan Uyghur, qazaq we bashqa türkiy millet kishilirini lagérlargha qamap, xelq'araning qattiq naraziliqigha uchrawatqan mezgilde sahibxaniliqni xitaygha bérishi xelq'arada qattiq ghulghula qozghighan. Ötken hepte gérmaniyelik putbol cholpini, en'gliye arsénal kulubining putbolchisi mes'ut özil xitayning Uyghurlargha tutqan mu'amilisini, shundaqla musulmanlarning buninggha süküt qiliwatqanliqini tenqidligenidi. 

Xelq'ara putbol birleshmisi yene xelq'arada béyjing qishliq olimpik musabiqisini bayqut qilish chaqiriqi küchiyiwatqan mezgilde sahibxanliqni shangxeyge bergen. Bu hepte amérika kéngesh palata ezasi rik skot bilen josh xowléy amérika döletlik putbol jem'iyiti NBA uniwérsalning diréktori stéfan burk bilen NBA olimpikining prézidéti geriy zénkilgha mektup yézip, ularni béyjingning qishliq olimpik musabiqisige sahibxanliq qilishini bikar qilish heqqide xelq'ara olimpik komitétigha iltimas qilishini telep qilghan.

Rik skot bilen josh xowléy mektubida, xitayning noqul diniy étiqadi seweblik bir milyondin artuq Uyghurni "Qayta-terbiyelesh lagérliri" gha qamighanliqini bildürüp, buning yéqinda ashkarilan'ghan höjjetlerde ispatlan'ghanliqini tekitligen. Lékin, fransiye agéntliqining xewiride tekitlinishiche, inféntino jüme küni qatarda muxbirlargha qilghan sözide yene, "Dunya hel qilalmighan mesililerni xelq'ara putbol birleshmisi hel qilalmaydighanliqi" ni bildürgen.

Toluq bet