Xitayning skarboro ariligha tekshürüsh ponkiti qurush pilani etraptiki döletlerni bi'aram qildi

Muxbirimiz erkin
2017-03-17
Share

Xitay emeldarlirining "Xeynen géziti"ge söhbet élan qilip, bu yil igilik hoquqi filippin bilen talash -tartishtiki skarboro arilida tekshürüsh ponkiti quridighanliqini élan qilishi etraptiki döletlerni bi'aram qilghan.

B b s ning xewer qilishiche, filippin tashqi ishlar ministirliqi bayanatchisi jüme küni bu xewerni éniqlashqa kirishkenlikini bildürgen. Xitay, xu'angyen dep ataydighan sépratil taqim arallirigha qarashliq skarboro arilini 2012‏-yili bésiwalghan idi. "Xeynen géziti" ning xewer qilishiche, yéqinda sensha shehirining bashliqi mezkur gézitke söhbet élan qilip, bu aralda muhit tekshürüsh ponkiti qurush qurulushining teyyarliq xizmiti mushu yil ichide bashlinidighanliqini bildürgen. B b s jüme küni tarqatqan xewiride, buning etraptiki döletlerni bi'aram qilip, bu rayonning jiddiy weziyitini ötkürleshtürüshke bashlighanliqini qeyt qildi.

Xitayning bu rayondiki déngiz xada tashlirini tindurup, sün'iy arallarni yasishi, bu arallarda herbiy eslihelerni qurushi rayondiki döletlerning qarshiliqigha uchrap kelgen. Amérika ilgiri zörür tépilsa, xitayning bu arallargha chiqishini tosidighanliqini bildürgen idi.

B b s ning xewiri élan qilinishtin bir qanche kün awwal, amérika kéngesh palatasining ikki ezasi qanun layihesi sunup, xitayning jenubiy déngizda qurulush qilishini jazalashni otturigha qoyghan. Kéngesh palata ezasi bén karson bilen marko rubi'o otturigha qoyghan mezkur qanun layihesi bu qurulushqa chétishliq xitay puqralirigha wiza bérishni cheklesh, bu kishilerge yardem qilghan we pul qerz bergen chet'el pul-‏mu'amile shirketlirige émbargo qoyush qatarliq mezmunlarni öz ichige alghan idi.

Amérika dölet ishlar ministiri téllirson shenbe küni xitaygha yétip baridu. B b s xewiride, jenubiy déngiz mesilisi ikki terep söhbitidiki halqiliq témilarning biri, dep qariliwatqanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.