Kishilik hoquqni közitish teshkilati xitayni Uyghur élidiki "Siyasiy terbiyilesh merkezliri" ni taqashqa chaqirdi

Muxbirimiz erkin
2017-09-11
Élxet
Pikir
Share
Print

Xelq'ara kishilik hoquqni közitish teshkilati 11‏-séntebir bayanat élan qilip, xitay hökümitini uning Uyghur élidiki barliq "Yépiq terbiyilesh merkezliri" ni taqashqa, bu merkezlerde tutup turuluwatqan barliq kishilerni derhal qoyup bérishke chaqirdi.

Xitay hökümiti 2017‏-yili 4‏-aydin bashlap Uyghur élining her qaysi wilayet, nahiyiliride omumiy yüzlük bu xil "Yépiq terbiyilesh merkezliri" ni échip, minglighan, on minglighan Uyghur we bashqa yerlik az sanliq milletlerni yighiwalghan idi. Kishilik hoquq közitish teshkilati bayanatida, xitay da'irilirining ulargha nishanliq xitay kimlik teshwiqati élip barghanliqini ilgiri sürgen.

Mezkur teshkilat öz bayanatida yene xitay ishliri diréktori, doktor sofiye richardsonning sözini neqil keltürüp, "Xitay da'iriliri bu kishilerni jinayet sadir qilghanliqi üchün emes, belki ularni siyasiy jehette ishenchlik emes, dep qarighanliqi üchün tutup turuwatidu," dégen. 

Xitay hökümiti hazirgha qeder "Yépiq terbiyilesh merkezliri" ge qanchilik Uyghurning solan'ghanliqi, ularni qandaq qanuni asaslargha tayinip solighanliqi we qanchilik uzun solaydighanliqi heqqide héchqandaq chüshenche bérip baqmidi. Doktor richardson xelq'ara kechürüm teshkilatining bayanatida yene "Hökümet bu kishilerni tutup turushqa héchqandaq bir ishenchlik seweb körsitip baqmidi. Ular derhal qoyup bérilishi kérek" dep tekitlidi. Hemde buning xitay asasi qanuni we xelq'ara kishilik hoquq qanunigha pütünley xilap ikenlikini ilgiri sürdi. 

Xelq'ara kishilik hoquqni közitish teshkilatining mezkur bayanatida yene "Xitay asasi qanunining 37 maddisida herqandaq kishini qolgha élish teptish yaki sotning testiqidin ötüshi kérek déyilgen. Biraq siyasiy terbiyilesh merkezliride tutup turush mesilisige teptish yaki sot arilashqandek qilmaydu," déyilgen.

Toluq bet