Әнглийә һөкүмити хитай билән русийәни “дуняға тәһдит селиватқан хәтәрлик күчләр” дәп тонуған

Мухбиримиз җәвлан
2023.03.14

“әл җәзирә” қанилиниң 14-март күни хәвәр қилишичә, әнглийәниң дөләт мудапиәси вә ташқи сиясәт һәққидә чиқарған йеңи доклатида хитай билән русийә “дуняниң муқимлиқиға тәһдит селиватқан хәтәрлик күчләр” дәп қаралған. Бу доклатта, “хитай билән русийәниң чоңқур достлуқи һәмдә русийәниң иран билән болған мунасивитиниң күнсери күчийиватқанлиқи дуня тәртипигә, җүмлидин әнглийә вә явропа дөләтлиригә зор тәһдит шәкилләндүрмәктә” дейилгән.

Әнглийә башминистир риши сунак юқириқи доклатқа язған кириш сөзидә: “русийә украинаға таҗавуз қилди вә ядро қорали тәһдити салди. Хитай болса җәнуби деңиз вә тәйвән боғузида иғвагәрчилик қилди. Булар бәлким қутуплашқан, хәтәр вә малиманчилиққа толған бир дуня пәйда қилиши мумкин” дегән.

“ройтерс агентлиқи” ниң 3-айниң 13-күни елан қилған хәвиридә ейтилишичә, хитай рәиси ши җинпиң келәр һәптә русийәгә берип русийә президенти виладимир путин билән көрүшидикән. Әмма хитай ташқи ишлар миниистирлиқи бу һәқтә һечқандақ баянат бәрмигән; русийә тәрәпму буниңға инкас қайтурмиған.

“вал стрет журнили” гезитиниң хәвәр қилишичә, ши җинпиң русийәни зиярәт қилип болғандин кейин, украина президенти виладимир зелниски билән телефонда көрүшүп, урушни тохтитиш һәққидә сала-сүлһи қилиши мумкин икән.

Хитайниң сина (шинлаң) торида берилгән хәвәргә қариғанда, хитай ташқи ишлар министир баянатчиси ваң венбин 3-айниң 14-күни, мухбирларға бәргән җавабида “хитайниң украина кризисини сиясий йол билән һәл қилиш мәйдани” ни қайта шәрһләп, бу урушни тохтитишта сәуди әрәбистан билән иранни яраштуруп қоюштәк “чоң дөләт роли” ни ойнайдиғанлиқини пәш қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.