Tramp hökümiti xitayning Uyghurlarni teqibleshke yardemleshken xeykang shirkitini qara tizimlikke élishni oylashmaqta

Muxbirimiz erkin
2019-05-22
Élxet
Pikir
Share
Print

Amérika hökümitining xitayning Uyghurlarni teqibleshke yardemleshken xeykang digital téxnologiye shirkitini qara tizimlikke élishni oylishiwatqanliqi ilgiri sürüldi.

"Blumbérg xewerliri" agéntliqining 22‏-may künidiki xewiride ashkarilinishiche, tramp hökümiti merkizi xangjodiki mezkur shirkettin bashqa yene 4 xitay shirkitini qara tizimlikke alidiken. Xewerde, buning xitayning daxu'a téxnologiye shirkitinimu öz ichige alidighanliqi ilgiri sürülgen. Xitayning xeykang shirkiti bilen daxu'a shirkiti uning Uyghur rayonida lagér qurup, Uyghur jem'iyitige qarita omumyüzlük digital nazaret élip bérishida halqiliq rol oynighan shirketlerdur.

Xewerde, bu shirketlerge qoyulghan cheklimining xu'awéy shirkitige qaritilghan cheklime bilen oxshash ikenliki, bu arqiliq xeykang shirkitining amérika téxnikisigha érishishi, amérika bazirigha kirishi cheklinidighanliqi bildürülgen. Xewerde qeyt qilinishiche, yuqiriqi xitay shirketlirining cheklinishi prézidént trampning xitayning yer shari téxnologiye bazirini monopol qilishini tosush tirishchanliqi bilen munasiwetlik bolupla qalmay, bu yene bu shirketlerning Uyghur musulmanlirining nazaret qilinishi we keng kölemlik tutqun qilinishida oynighan roli bilenmu munasiwetlik iken.

Xeykang shirkiti bilen daxu'a shirkiti xitay hökümitining Uyghur rayonida digital nazaret sistémisi qurup, 2 milyondek Uyghurni yighiwélish lagérlirigha qamashqa téxnikiliq yardem bérip, eng zor paydigha érishken shirketler dep qarilip kélin'gen. Xeykang shirkiti 2018‏-yili Uyghur rayonida hökümetning qimmiti 1 milyard 850 milyon yüenlik 5 xil bixeterlik toxtamigha érishken.

"Blunbérg xewerliri" ning xewiride qeyt qilinishiche, xeykang, daxu'a shirketlirining érishken zor paydisi bir mezgil bezi xelq'ara shirketlerni jelp qilghan bolsimu, mana emdi uninggha meblegh salghan shirketler pay chékini sétishqa bashlighan. Xewerde, xeykang we daxu'a shirketlirining pay chékining yéqinqi mezgil ichide 20 % chüshkenliki bildürülgen.

Kishilik hoquq teshkilatliri tramp hökümitining Uyghurlarning kishilik hoquqini depsende qilish bedilige béyiwatqan bu shirketlerni jazalishini telep qilip kelgen idi.

Toluq bet