Shi jinpingning amérikadiki ziyariti küchlük tenqidke uchridi

Washin'gtondin muxbirimiz irade teyyarlidi
2023.11.16

Amérika dölet mejlisining ezaliri xitay dölet re'isi shi jinping bilen kechlik ziyapetke qatnashqan amérikaliq zerdarlarni qattiq eyiblidi.

Melum bolushiche, “Amérika-xitay soda kéngishi” we “Amérika-xitay munasiwetliri komitéti” namliq ikki organ xitay dölet re'isi shi jinpingning san-firansiskodiki ziyariti mezgilide uning sheripige bir kechlik ziyapet orunlashturghan. Ular bu ziyapetke qatnishishni arzu qilghan shirket bashqurghuchilirigha bilet satqandin sirt, shi jinping bilen bir üstelde olturmaqchi bolghanlarning bélet bahasini 40 ming dollar qilip békitken.

Amérikadiki mayk gelligir qatarliq siyasiyonlar we bashqa köpligen kishilik hoquq terepdarliri bu weqeni küchlük tenqidlidi. “Amérika-xitay istratégiyelik riqabet pewqul'adde komitéti” ning re'isi, awam palata ezasi mayk gelligir bayanatida, Uyghurlargha irqiy qirghinchiliq yürgüzüwatqan we hemde éghir kishilik hoquq depsendichiliki bilen shughulliniwatqan bu hakimiyetning rehbiri bilen ghizalinish üchün yene mushu hakimiyetning ademliri teripidin orunlashturulghan ziyapetke qatnashqan amérikaliq tijaretchilerni qattiq eyibligen. U “X” tiki inkasida “Siler shi jinping bilen bu ziyapette néme dep paranglashmaqchi? Uyghurlargha qiliwatqan irqiy qirghinchiliqingiz qandaq kétiwatidu, xongkongluqlarni ongushluq basturghanliqingizni tebrikleymiz, dep söhbetleshmekchimu?” dégen.

Melum bolushiche, shi jinping bilen bir üstelde olturghan shirket lidirliriningmu tizimliki élan qilin'ghan bolup, ular alma shirkiti, qaratash (BlackRock), emwey we bo'ing (Boeing) qatarliq shérketlerni öz ichige alidiken.

Xitay dölet re'isi shi jinpingning amérikadiki ziyariti kishilik hoquq terepdarliriningmu küchlük tenqidige duch kelgen idi. Doktor adriyan zénz ependi radiyomizgha qilghan sözide, amérika hökümitining özi irqiy qirghinchiliq qiliwatidu dep bahalighan bir döletning rehbirini kütüwélishi uning kishilik hoquq mesilisidiki inawitini tökidu, dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.