Amérika sabiq dölet iqtisad komitéti mudiri: “Shi jinping her qandaq bedel töleshke qarimay xitayni kontrol qilmaqchi”

Ixtiyariy muxbirimiz jewlan
2021.08.09

Amérika dölet iqtisad komitétining sabiq mudiri lerri lindsi yéqinda foks téliwiziyesining iqtisad programmisida söz qilip, xitayning yéngi soda qanuni we cheklimiliri, yeni monopulluqqa qarshi turush, sanliq melumat bixeterliki qatarliq qanun-cheklimilirige heyran qalmasliq kéreklikini bildürgen. U mundaq dégen: “Menche, xitay karxanilirining béshigha kelgen ishlargha ejeblenmisimu bolidu. Xitay kompartiyesining nöwettiki asasliq wezipisi shi jinpingning hakimiyitini qoghdash. Shu sewebtin, xitaydiki nurghun karxanilar xitay kompartiyesining kontrol qilishi we tehditige uchridi. Ular her qandaq bedel tölishige qarimay, bu karxanilarni kontrol qilidu”.

U yene amérikaning nöwettiki pul-mu'amile siyasitining shi jinping hakimiyiti üchün paydiliq ikenlikini bildürüp mundaq dégen: “Baydin hökümiti téxi birer heriket qollanmidi. Bizning nahayiti kengchil pul-mu'amile siyasitimizdiki mesile shuki, melum mezgilde u kishilerning amérikadiki merkiziy banka — fédiral xezine komitétigha bolghan ishenchini azaytip qoyidu. Bu jehettin éytqanda, bizning hazir élip bériwatqan maliye we pul-mu'amile siyasitimiz, uzaq mezgildin qarighanda shi jinping üchün paydiliq bolup, uning öz nishanini emelge ashurushigha yardem béridu”.

Analizchilarning qarishiche, xitay re'isi shi jinping xususiy karxanilarning tereqqiyatini cheklep, dölet karxanilirini yölewatqan bolup, eli baba, téngshün qatarliq dangliq shirketlerge “Monopulluqqa qarshi turush” namida  qol sélishqa bashlighan. Bu heriket xitaylar arisida “Choshqini béqip semritip andin göshini shiliwélish” dep atilidiken. Xitay hökümiti yene uchur-téxnologiye shirketlirini “Dölet bixeterlikini qoghdash” namida kontrol qilip, ularning xelq'ara pay chéki bazirida pul tépip, öz tesirini kücheytip, xitay üchün qandaqtur xelq'ara tehdit peyda qilishigha yol qoymighan.              

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.