Xitay hökümiti “Shi jinping idiyesi” ni xitay asasiy qanunigha kirgüzmekchi

Shinxu'a agéntliqining 19-yanwardiki xewirige qarighanda, mushu ayning 18-19-künliri béyjingda échilghan xitay kompartiyisining 19-qurultiyi 2-nöwetlik omumiy yighinida, “Shi jinpingning yéngi dewrdiki junggochu sotsiyalizm qurush idiyesi” ni xitay asasiy qanunigha kirgüzüsh muzakire qilin'ghan.

Shi jinping textke chiqqandin buyan uning barliq hoquqni öz qoligha merkezleshtürüp, xitayda hakimmutleqliq siyasiy tüzülmini berpa qilghanliqi xelq'ara taratqularda söz témisi boluwatqan bir mezgilde xitay da'irilirining atalmish “Shi jiping idiyisi” ni xitay asasiy qanunigha kirgüzmekchi bolghanliqi xelq'ara taratqularda jiddiy diqqet qozghidi.

Roytérs, firansiye radiyosi, b b s qatarliq taratqularda bügün bu heqte mexsus xewerler bérildi. 19-Yanwar küni roytérs agéntliqi “Xitay shi jinping idiyisini asasiy qanun'gha kirgüzmekchi” serlewhilik maqale élan qilindi. Firansiye radiyosi tarqatqan xewerde “Eger shi jinping idiyisi xitay asasiy qanunigha kirgüzülse, nöwette xitay kompartiyisining bash sékrétarliq wezipisini ötewatqan shi jingping mawzidongdin kéyin “Idiyisi” xitay asasiy qanunigha kirgüzülgen 2-shexs bolup qalidu” déyildi. 

B b s agéntliqining bu heqtiki xewiride “Xitay 1982-yildin buyan 4 qétim asasiy qanunigha tüzitish kirgüzdi. Xitay asasiy qanunida peqet mawzidong we ding shawpingningla ismi bar, jyang zéminning ‛3 ke wekillik qilish‚ idiyisi asasiy qanun'gha kirgüzülgen bolsimu, emma uning ismi yoq idi. Bu qétim shi jinpingning ‛yéngi dewrdiki junggochu sotsiyalizm qurush idiyisi‚ xitay asasiy qanunigha uning öz ismi bilen kirgüzülmekchi,” déyildi.

Bultur 10-ay mezgilide xitay kompartiyisi 19-qurultiyining 1-nöwetlik yighinida “Shi jinpingning yéngi dewrdiki junggochu sotsiyalizm qurush idiyisi” xitay kompartiyisining nizamnamisige kirgüzülgenliki jakarlan'ghan idi. Shuningdin buyan pütkül xitay miqyasida “Shi jinping idiyisi” ni öginish dawamliship kelmekte.