Хитай хәлқ қурултийи ши җинпиңниң өмүрлүк һөкүмран болушини қанунлаштурушқа тәрәддут қилмақта

Мухбиримиз үмидвар
2018-03-04
Share

Хитайниң 13-нөвәтлик мәмликәтлик сиясий кеңәш йиғини 3-март күни башланған болуп, хәлқ қурултийиниң йиғини 5-март күни башлинидикән. Нөвәттә 13-нөвәтлик хитай хәлқ қурултийиниң биринчи қетимлиқ йиғинида хитай асасий қануниға өзгәртиш киргүзүш, йәни дөләт рәиси вә муавин рәисниң икки қетим вәзипә өтәш чәклимисини бикар қилиш лайиһисиниң рәсмий қобул қилиниши мумкинлики пәрәз қилинмақта.

Йәкшәнбә күни бейҗиңда өткүзүлгән хитай хәлқ қурултийи йиғининиң күн тәртиплири һәққидики мухбирларни күтүвелиш йиғинида сөзлигән баянатчи бу қетим асасий қанунға түзитиш киргүзүш лайиһисини қарап чиқип, 11-март күни қарардин өткүзидиғанлиқини билдүргән.

Өткән һәптидин буян хитай асаси қанунидики дөләт рәиси вә муавин рәисиниң пәқәт икки қетим вәзипә өтәш һоқуқи барлиқиға аит бәлгилимә чиқирип ташлинидиғанлиқи мәсилиси хәлқарада зор ғулғулиларни қозғиған болуп, бу ши җинпиңниң мустәбитлик йолиға, йәни мәңгүлүк рәис болуш йолиға қәдәм ташлиғанлиқи дәп тәнқид қилинған иди. 

Радийомиз хитай бөлүминиң тәпсилатидин қариғанда, йәкшәнбә күни өткүзүлгән ахбарат елан қилиш йиғинида хәлқ қурултийи ахбарат баянатчиси мухбирниң асаси қанунға түзитиш киргүзүш ши җинпиңниң мәңгүлүк дөләт рәиси болушиниң тәйярлиқиму, дегән соалиға җаваб бәргәндә асасий қанунниң "ши җинпиң ядролуқидики партийә мәркизи комитетниң абруйи вә бирликкә кәлгән рәһбәрлики үчүн пайдилиқ" дегән. 

Чиңхуа университетиниң бир оқутқучиси мәзкур баянатчиниң сөзиниң өмүрлүк дөләт рәислик түзүминиң аллиқачан бекитилип болунғанлиқиниң ипадиси дегән. Әлвәттә, бир қисим анализчилар охшашла ши җинпиңниң асасий қанун өзгәртиш бойичә өмүрлүк рәис болуши вә мустәбит түзүмни техиму күчәйтиши уйғурлар дияриға қаритилған тәқибләш тәдбирлириниң техиму күчәйтилиши билән мунасивәтлик болидиғанлиқини оттуриға қоймақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт