Хитай рәиси ши җинпиң қирғизистан билән таҗикистанни зиярәт қилиду

Мухбиримиз әркин
2019-06-10
Елхәт
Пикир
Share
Принт

Хитай рәиси ши җинпиңниң 12‏-июндин 16 ‏-июнғичә қирғизистан билән таҗикистанни зиярәт қилип, хитайниң оттура асиядики муһим истратегийилик орунға игә бу икки җумһурийәт билән өзара сиясий ишәнчини күчәйтишкә һәрикәт қилидиғанлиқи илгири сүрүлди. Ши җинпиңниң америка-хитай сода уруши, технологийә вә җәнубий деңиз мәсилилиридики ихтилапи кәскинләшкән, шуниңдәк хитай һөкүмитиниң 2 милйондәк уйғур, қазақ вә башқа түркий милләтләрни тутқун қилип, йиғивелиш лагерлириға қамиши ғәрб дунясиниң шиддәтлик тәнқидигә учраватқан мәзгилдә бу икки җумһурийәтни зиярәт қилиши диққәт қозғимақта.

Көзәткүчиләрниң илгири сүрүшичә, ши җинпиң бу зиярәт арқилиқ америка билән болған сода уруши вә лагерлар мәсилисидә бу җумһурийәтләрниң қоллишини қолға кәлтүрүшни мәқсәт қилидикән. Таҗикистан билән қирғизистан уйғур райониға қошна җумһурийәтләр болсиму, лекин улар һазирға қәдәр хитайниң мәзкур районда омумйүзлүк тәқибләш елип берип, 2 милйондәк уйғур, қазақ, қирғиз вә башқа түркий милләтләрни лагерларға қамиши, уларниң тили, мәдәнийити диний етиқадини чәклишигә көз юмуп кәлгән иди. Қирғизистан ахбарат агентлиқи AKIPres ниң хәвәр қилишичә, ши җинпиң 12‏-июндин 14‏-июнғичә қирғизистанни, 14‏-июндин 16‏-июнғичә таҗикистанни зиярәт қилидикән.

Хәвәрдә, хитай ташқи ишлар министирлиқиниң муавин министири җаң хәнхуйниң сөзи нәқил кәлтүрүлгән болуп, у ши җинпиңниң қирғизистанда шаңхәй һәмкарлиқ тәшкилатиниң 19‏-нөвәтлик башлиқлар йиғиниға қатнишидиғанлиқи, шуниңдәк таҗикистанда өткүзүлидиған 5‏-нөвәтлик «асияда өз ара алақә вә ишәнч турғузуш өлчими» намлиқ башлиқлар йиғиниға иштирак қилидиғанлиқини билдүргән. Хәвәрдә қәйт қилинишичә, ши җинпиң қирғизистан вә таҗикистандики мәзгилидә рәсмий, ғәйрий рәсмий сөһбәт, паалийәт вә икки тәрәплимилик учришишларда болуп, бир қатар келишим вә хитапнамиларни имзалайдикән. Лекин хәвәрдә, бу сөһбәт, учришиш вә паалийәтләрдә лагерлар мәсилисиниң күнтәртипкә келидиған яки кәлмәйдиғанлиқи тилға елинмиған.

Пикирләр (0)
Share
Толуқ бәт