Xitay re'isi shi jinping qirghizistan bilen tajikistanni ziyaret qilidu

Muxbirimiz erkin
2019.06.10

Xitay re'isi shi jinpingning 12‏-iyundin 16 ‏-iyun'ghiche qirghizistan bilen tajikistanni ziyaret qilip, xitayning ottura asiyadiki muhim istratégiyilik orun'gha ige bu ikki jumhuriyet bilen öz'ara siyasiy ishenchini kücheytishke heriket qilidighanliqi ilgiri sürüldi. Shi jinpingning amérika-xitay soda urushi, téxnologiye we jenubiy déngiz mesililiridiki ixtilapi keskinleshken, shuningdek xitay hökümitining 2 milyondek Uyghur, qazaq we bashqa türkiy milletlerni tutqun qilip, yighiwélish lagérlirigha qamishi gherb dunyasining shiddetlik tenqidige uchrawatqan mezgilde bu ikki jumhuriyetni ziyaret qilishi diqqet qozghimaqta.

Közetküchilerning ilgiri sürüshiche, shi jinping bu ziyaret arqiliq amérika bilen bolghan soda urushi we lagérlar mesiliside bu jumhuriyetlerning qollishini qolgha keltürüshni meqset qilidiken. Tajikistan bilen qirghizistan Uyghur rayonigha qoshna jumhuriyetler bolsimu, lékin ular hazirgha qeder xitayning mezkur rayonda omumyüzlük teqiblesh élip bérip, 2 milyondek Uyghur, qazaq, qirghiz we bashqa türkiy milletlerni lagérlargha qamishi, ularning tili, medeniyiti diniy étiqadini cheklishige köz yumup kelgen idi. Qirghizistan axbarat agéntliqi AKIPres ning xewer qilishiche, shi jinping 12‏-iyundin 14‏-iyun'ghiche qirghizistanni, 14‏-iyundin 16‏-iyun'ghiche tajikistanni ziyaret qilidiken.

Xewerde, xitay tashqi ishlar ministirliqining mu'awin ministiri jang xenxuyning sözi neqil keltürülgen bolup, u shi jinpingning qirghizistanda shangxey hemkarliq teshkilatining 19‏-nöwetlik bashliqlar yighinigha qatnishidighanliqi, shuningdek tajikistanda ötküzülidighan 5‏-nöwetlik “Asiyada öz ara alaqe we ishench turghuzush ölchimi” namliq bashliqlar yighinigha ishtirak qilidighanliqini bildürgen. Xewerde qeyt qilinishiche, shi jinping qirghizistan we tajikistandiki mezgilide resmiy, gheyriy resmiy söhbet, pa'aliyet we ikki tereplimilik uchrishishlarda bolup, bir qatar kélishim we xitapnamilarni imzalaydiken. Lékin xewerde, bu söhbet, uchrishish we pa'aliyetlerde lagérlar mesilisining küntertipke kélidighan yaki kelmeydighanliqi tilgha élinmighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.