Amérika, yaponiye, jenubiy koréye rehberliri b d t ni shimaliy koréyege qarshi qattiq tedbir élishqa chaqirdi

Amérika, yaponiye, jenubiy koréye jüme küni b d t xewpsizlik kéngishini téz arida qarar maqullap, shimaliy koréyege qarshi yéngi émbargo tedbirlirini élishqa chaqirghan.

Gérmaniyening hamburg shehiride 20 guruhining bashliqlar yighinigha qatnishiwatqan amérika prézidénti donald tramp, yaponiye bash weziri shinzu abé we jenubiy koréye prézidénti mun jé'in jüme küni körüshken. 3 Dölet rehbiri körüshüshtin kéyin ortaq bayanat élan qilip, b d t xewpsizlik kéngishini shimaliy koréyege qarshi yéngi émbargo qarari chiqirishqa heydekchilik qilish heqqide ortaq pikir hasil qilghanliqini bildürgen.

Bayanatta, xelq'ara jem'iyetni b d t ning qararlirini téz, qattiq we toluq ijra qilishqa, tedbir qollinip, shimaliy koréye bilen bolghan iqtisadi munasiwetke cheklime qoyushqa chaqirghan. Biraq roytérs agéntliqining bildürüshiche, xewpsizlik kéngishi, qalghan ikki da'imiy eza rusiye bilen xitayni qayil qilish mesilisige duch kélidiken. Shimaliy koréye seyshenbe küni qit'eler ara bashqurulidighan bomba siniqi élip bérip, amérika we uning sherqiy shimali asiyadiki yaponiye, jenubiy koréye qatarliq ittipaqdashlirining jiddiy hoshyarliqini qozghighan. 

Tramp hökümiti zörür tépilsa qoral küchi ishlitishke teyyarliqini bildürgen bolsimu, biraq yenila mesilining diplomatik yollirini izdeydighanliqini bildürgen idi. Xitay shimaliy koréyening eng chong soda shériki. U shimaliy koréyening bashqurulidighan bomba siniqigha qarita tereplerni özini tutuwélishqa chaqirip, shimaliy koréye seweblik özining imbargogha uchrishini xalimaydighanliqini ipadiligen idi.