Shimaliy xitaydikiler bashqa jaylardikilerdin 3yil burun ölüp kétidiken

Muxbirimiz jüme
2017.09.16
Share on WhatsApp
Share on WhatsApp

Yéqinda élan qilin'ghan bir tetqiqat netijisige qarighanda, shimaliy xitayning bulghan'ghan sheherliridiki kishiler bashqa jaylardikilerge qarighanda 3 yil burun ölüp kétidiken.

Bu heqtiki tetqiqat netijisi amérikidin chiqidighan “PNAS” yeni amérika döletlik penler akadémiyisining ilmiy zhurnilida élan qilin'ghan. Uninggha qarighanda, issinish par qazanlirigha qalan'ghan kömürler xitayning shimalida éghir hawa bulghinish hadisisi keltürüp chiqiridiken.

Shimaliy xitaydiki bulghinish xitayning jenubidiki rayonlargha qarighanda 46 pirsent éghir bolup, bu shimaldiki kishilerning ömrini jenubiy rayonlardikige qarighinida 3.1 Yil qisqartqan.

Ölümlerning köpinchisi nepes yoli késelliklirige munasiwetlik iken.

“Soda ichki xewerler tori” da körsitishiche, xitay da'iriliri 1950-yili “Xu'eyxé deryasi siyasiti” namliq bir siyaset tüzüp chiqip, bu siyaset boyiche xu'eyxé deryasining shimaliy qismidiki rayonlarni qish peslide issinishqa bikarliq kömür bilen teminligen.

Bu siyaset 1980-yilighiche yürgüzülgen. Kömür köydürüsh keltürüp chiqarghan bulghinish shimaliy xitaydiki 500 milyon ademge tesir körsetken.

Amérika penler akadémiyisining ilmiy zhurnilida 2013-yili élan qilin'ghan oxshash doklatta xitayning shimalidiki kishilerning otturiche ömri bashqa jaylardikilerge qarighanda 5 yil qisqa bolidighanliqi, bu rayonlardiki bulghinishning bashqa jaylargha qarighanda 50 pirsent yuqiriliqi körsitilgen idi.

Xébéy ölkisi xitayning shimaligha jaylashqan we xitay boyiche bulghan'ghan sheherler eng köp rayonlarning biri.

Emma, bash shtabi london'gha jaylashqan ékologiyilik muhit xewerler tori - “Xitay di'alogi” ötken yili iyundiki bir xewiride yéqin kelgüside Uyghur éli hawasidiki bulghinish derijisining xébéy ölkisining aldigha ötüp kétishi mumkinlikini bildürgen.

“Yéshil tinchliq teshkilati” shu yili 20-aprél élan qilghan doklatidimu xitaydiki hawa bulghinishning gherbiy sheherlerge qarap köchüwatqanliqini, qeshqer we xotenning xitaydiki eng bulghan'ghan sheherler tizimlikining töridin orun alghanliqini körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet