Америка адаләт министирлиқи шинхуа агентлиқини “чәтәл агентлири” сүпитидә тизимлашни буйруди

Мухбиримиз шөһрәт һошур
2018.09.19

Бүгүнки хәлқара ахбаратларда хәвәр қилинишичә, америка адаләт министирлиқи хитайниң шинхуа агентлиқи билән йәршари телевизийәсиниң америкидики шөбилирини “чәтәл агентлири” қатарида тизимлашқа буйруқ чиқарған.

Хәвәрләрдә дейилишичә, бу буйруққа асасән мәзкур икки шөбә өзлириниң малийә кирим-чиқими вә мунасивәтлик орунлири һәққидә мәлумат беридикән. Мәлум болушичә, бу буйруқ америкида 1938‏-йилидин буян иҗра қилиниватқан болуп, қисқартилип FARA дәп атилидиған чәтәл хадимлирини тизимлаш қануниға асасән чиқирилған икән.

Игилинишичә, мәзкур қанун чәтәл һөкүмәтлириниң ахбарат васитиси арқилиқ америка җамаәт пикиригә вә бу арқилиқ америка һөкүмитигә тәсир көрситишиниң алдини елиш үчүн түзүлгән, йәни мустәқил ахбарат оргини болмиған, чәтәл һөкүмәтлириниң қанити болған ахбарат орунлириниң америкида җасуслуқ ролини ойнап қелишиниң алдини елишни мәқсәт қилған.

Буниңдин илгири “хитай күндилики”, “шинмиң кәчлики” қатарлиқ хитай гезитлириму мәзкур қанун бойичә тизимға алдурулған. Буниңдин башқа йәнә русийәниң 2016‏-йиллиқ америка президент сайлимиға арилашқанлиқи илгири сүрүлүватқан мәзгилләрдә русийәниң “бүгүнки русийә” вә “сүний һәмраһ радиоси” қатарлиқ ахбарат органлириму бу қанун бойичә тизимға елинған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.