Хитай  американиң 28 ширкитигә експорт чәклимиси қойған

Хитай американиң 28 ширкитини “дөләт бихәтәрлики вә мәнпәәтини қоғдаш” йүзисидин експорт чәклимиси тизимликигә киргүзгән.

“ройтерс агентлиқи” ниң 2-январ күни бу һәқтә бәргән хәвиридә ейтилишичә, хитай мал експорт қилишни чәклигән бу америка ширкәтлири ичидә һәммибаб динамикилиқ күч ширкити (GD. N), бойин ширкити мудапиә ишлири мәркизи, аләм бошлуқи вә хәвпсизлик ширкити, локид мартен ширкити, райтон башқурулидиған бомба мудапиә ширкити қатарлиқлар бар икән. Хитай сода министирлиқиниң билдүрүшичә, хитай 2-январ күнидин башлап бу ширкәтләргә қош истемал буюмлири, йәни хәлқ истемалиға һәм һәм һәрбий ишларға ишләткили болидиған истемал буюмлирини експорт қилишни чәкләйдикән.

“ню-йорк вақти гезити” ниң 2-январ бу һәқтә бәргән хәвиридә қәйт қилинишичә, хитай йәнә тәйвәнгә қорал сетишқа мунасивәтлик болған 10 америка ширкитигә мал експорт қилишни чәкләйдикән һәм уларниң хитайда сода қилишини, ширкәт директорлириниң хитайға кирип-чиқишини мәни қилидикән.

Хәвәрдә мундақ дейилгән: “бир нәччә һәптидин кейин американиң пирезидентлиқ вәзиписигә олтуридиған доналд трамп хитайға еғир таможна беҗи қойидиғанлиқиға вәдә бәргәниди. Демәкки, хитай бу експорт чәклимиси арқилиқ америкаға қайтурма зәрбә беришкә тәйярлинип болғанлиқини билдүрди”.

Америкадики “ширкәтләр учрайдиған хәтәрни контрол қилиш мәркизи” дики мутәхәссисләрниң қаришичә, хитай һөкүмити илгириму бу ширкәтләргә тар даиридә бәзи чәклимиләрни қоюп кәлгән. Әмма бу ширкәтләрниң  көпинчисиниң хитайдики тиҗарәт көлими унчә чоң әмәс икән.