Uyghurlargha hésdashliq qilghan xitay adwokat "Milliy öchmenlikke qutratquluq qilish" bilen sotlanmaqchi

Muxbirimiz erkin
2015-05-15
Share

Xitay teptish da'irilirining jüme küni élan qilishiche, torda xitayning Uyghur siyasitini mustemlikichilik, dep tenqid qilghan adwokat pu jichyang "Milliy öchmenlikke qutratquluq qilish, parakendichilik peyda qilish" bilen eyiblinip sotlinidiken.

Pu jichyang 2014‏-yili yili 5‏-ayda qolgha élin'ghan. Béyjing sheherlik teptish mehkimisi jüme küni élan qilghan bayanatida: "Pu jichyang torda yazghan milliy öchmenlikke qutratquluq qilish, ijtima'iy tertipke buzghunchiliq qilish qilmishi seweblik jinayi jawabkarliqqa tartilidu" dégen.

Pu jichyang ilgiri özining mikro blogida xitayning Uyghur siyasitini tenqidlep, "Eger shinjang rast junggoning parchisi bolsa uninggha mustemlikichi, ishghaliyetchi we bulangchidek mu'amile qilmasliq kérek" dégen. Shuningdin kéyin da'iriler pu jichyangning mikro blogini taqighan.

Pu jichyang xitayning emgek bilen özgertish lagérlirini taqashta aktip rol oynighan adwokatlarning biri idi. Uning qolgha élinishi amérika, yawropa ittipaqi we xelq'ara kishilik hoquq teshkilatlirining tenqidige uchrighan.

Amérika dölet ishlar ministirliqi yéqinda pu jichyangni qoyup bérishke chaqirghan. Lékin béyjing hökümiti amérikini xitayning edliye ishlirigha arilashmasliqqa agahlandurghan idi.

Pu jichyangning adwokati mo shawping jüme küni: "Pu jichyanggha artilghan jinayetning héchqandaq asasi yoq" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet