Xitaydiki 12 neper adowkat xitay da'iriliridin özlirige qoyulghan "Sayahet cheklimisi" ni bikar qilishni telep qildi

Muxbirimiz irade
2015-11-12
Share

Xitaydiki 12 neper kishilik hoquq adwokati ochuq xet élan qilip, xitay hökümitidin özlirige qoyulghan "Chet'elge chiqish cheklimisi" ni bikar qilishni telep qildi.

"Xitay kishilik hoquq adwokatlirini közitish teshkilati" ning élan qilghan xewiridin qarighanda, bu 12 neper adowkat xitay da'iriliri teripidin "Chet'elge chiqsa dölet menpe'itige ziyan keltüridu" dégen guman bilen qara tizimlikke élin'ghan kishiler bolup, ularning pasport élip chet'ellerge chiqishi izchil tosalghugha uchrap kelgen iken.

Adwokatlar peyshenbe küni béyjing sheherlik jama'et xewpsizlik idarisining bashliqi wang shyawxonggha qaritip yazghan ochuq xétide, özlirining dölettiki qanun'gha asasen xizmet qiliwatqan qanunluq adwokatlar ikenlikini, dewagerlirining hoquqini xitayda békitilgen qanunlargha asasen qoghdighanliqini eskertken we bu sayahet cheklimisining qanunsiz ikenlikini bildürgen.

Chén jyen'gang, xu'ang simiy qatarliq bu adwokatlar xétide yene, eng asasiy puqraliq hoquqigha qiliniwatqan depsendichilik ayaghliship, sayahet cheklimisi bikar qilinmighuche erz qilishtin toxtap qalmaydighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet