Amérika bash elchisi xitayni rusiye heqqidiki yalghanlirini yighishturushqa chaqirdi

Muxbirimiz jewlan
2022.07.05
Share on WhatsApp
Share on WhatsApp

Amérika qoshma shitatliri (a q sh) ning xitayda turushluq bash elchisi nikolas burns (Nicholas Burns) 4-iyul küni chingxu'a uniwérsétitide chaqirilghan bir qétimliq xelq'araliq yighinda “Xitay hökümiti rusiye heqqidiki yalghan uchurlirini tézdin yighishturiwélishi lazim” dep körsetken.

“Blumbérg xewerliri” ning 4-iyuldiki xewiride éytilshi'iche, nikolas burns shu küni xitay hökümiti sahibxanliq qiliwatqan xelq'araliq yighinda muxbirlarning xitay heqqidiki so'allirigha duch kelgen. Muxbirlar “Rusiyening ukra'inagha tajawuz qilishini chöridigen kirizisni hel qilishta xitay némilerni qilalishi mumkin?” dep sorighanda, u “Xitay tézdin rusiye heqqidiki yalghan-yawdaq uchurlirini yighishturiwélishi, shuningdek moskwaning tajawuzigha hemdem bolmasliqi kérek,” dep jawab bergen.

Xewerde éytilishiche, bu xitay tewesidiki eng yuquri derijilik amérika diplomatining tunji qétim xitay heqqide biwaste halda ashundaq qattiq söz qilishi hésablinidiken. Gerche bash elchi nikolas bu sözlerni xitay tashqiy ishlar ministirliqigha qarita éytqan bolsimu, emma buning xitay hökümi'itigimu qaritilghanliqi éniq iken. U bu heqte söz qilip: “Men xitay tashqiy ishlar ministirliqining bayanatchisi aghzidin chüshürmey kéliwatqan ‛NATO undaq tajawuz qildiyey, amérika hökümiti ukra'inada bi'ologiyelik qoral tejribixanisi qurdiyey‚ dégendek yalghanlirini tézdin yighishturwalsiken, deymen” dégen.

Xitay tashqiy ishlar minsitirliqining bayanatchisi jaw lijyen buninggha tézdin inkas qayturup, amérika hökümitini yalghanchiliqta eyibligen. Rusiyening béyjingdiki bash elchisi andréy dénisow (Andrey Denisov) mu jaw lijyen'ge awaz qoshup söz qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.